Япония кеча гуруҳ босқичида мусобақа фаворити сифатида қайд этилган Германиядан устун келди. Жанубий Корея айни вақтда Уругвай билан куч синашмоқда. Кечки дастурлардан Бразилия - Сербия ўйини ҳам ўрин олган. Мазкур беллашувлар юзасидан Суперлиганинг жорий йилги тўпурари, сербиялик футболчи Драган Чераннинг фикрлари билан қизиқдик.

- Биринчи тур учрашувлари якунига етиб боряпти. Кузатган ўйинларингиздан қандай таассуротлар қолди?

- Мусобақанинг очилиш ўйинлари шуни исботладики, ҳозирги кунда осон жамоа қолмаган. Ёмон терма жамоанинг ўзи йўқ. Чунки барча футбол ўйнашни, қандай тўп тепишни ўрганиб олган.

- Қайси баҳс натижасини кутилмаган сифатида қабул қилдингиз?

- Ҳозирча фақат Аргентинанинг мағлубияти нафақат мен, балки кўпчилик учун сюрпириз бўлди.

- Япониянинг Германиядан уч очко тортиб олиши чиндан ҳам сенсациями ёки...

- Япон футболининг охирги йиллардаги менталитети улар Осиёдан ўзиб кетганини кўрсатади. Саудия Арабистонида кучли чемпионат бор. Сифатли ижрочиларга эга. Деярли ярим жамоа бирга тўп тепиб келмоқда. У ерда ҳақиқатдан ҳам футбол ривожланмоқда.

- Бразилия - Сербия учрашувида ҳамюртларингизнинг имкониятларини қандай баҳолайсиз?

- Бизда жуда қийин гуруҳ бор. Фаворит - Бразилия. Менимча, Камерун ва Швецария билан ўйинларда имконият қидириб кўриш керак. Бироқ Сербияда кучли футболчилар, тажрибали мураббий жамланган. Жарангли номлар бор. Умид қиламанки, Сербия гуруҳдан чиқишни уддалайди.

- Мусобақа фаворити ким?

- Ким фаворит эканлиги гуруҳ босқичидан кейингина нисбатан аниқ бўлиб улгуради.

Драган Черан: "Япония Осиё футболидан ўзиб кетган"