Терма жамоамиз соат 11:00да, биз эса тунда йўлга чиқдик. Сабаби оддий, ўйинни эртасига жиддий машғулот ўтказилмайди. Шу боисдан Миржалол Қосимов футболчилар билан пляжда тикланиш машқини ўтказди. У ерда терма жамоамиз аъзолари пляж футболида ўзларини синаб кўрдилар.

Мен ва ҳамроҳим Саидмурод акага Алишер ака (Никимбаев) "Ал Жазира" стадионидан жой қилиб қўйган эдилар. Очиғи стадион меҳмонхонаси қандай бўлишини тасаввур қила олмаётган эдим. Меҳмонхона манзилини картага тердим, машина бизни тўғри стадион ичига олиб келса денг. Мен ён атрофида бўлса керак деб ўйлаган эдим. Ҳа, тонг отсин барчасини кўраман-да.

Ресепшендаги қиз бизни илқ кутиб олди, рўпарамда нарх-наво осиғлиқ турар эди. 2 кишилик хонанинг нархи бир кечага, 320 АҚШ доллари. Сочларингиз тикка бўлдим дейишга шошилманг, бир ҳафта аввал Алишер ака мазкур меҳмонхонани нонуштаси билан 93 АҚШ долларига гаплашиб қўйган эканлар. Кейин билсам, бу 5 юлдузли меҳмонхонада фақат клубга ва БАА футбол федерациясининг меҳмонлари истиқомат қилишлари мумкин экан. Бунинг учун Алишер Никимбаевга ўз миннатдорчилигимизни билдирамиз. Чарчаганимиз сабабми, ортиқча нарсаларга эътибор бермадим. Шунчаки дўкончага тушиб майда-чуйда олиб чиқдим. Стадион атрофини бироз айландим. Стадион менимча тўлиқлигача ўзини оқлайди. Бизда ареналар музей сифатида қўриқланади. Бу ерда истасангиз кечаси келиб ҳам трибунага чиқиб ўтиринг, биров ғинг демайди. Стадион атрофида бир нечта машғулот майдонлари бўлиб, унда расмий ва норасмий клублар машғулот ўтказишлари ёки тунда ўртоқлик учрашувларини ўтказишлари мумкин эди.

Табиийки эртаси куни тонг отди, мен айнан шундан кейин қаерда истиқомат қилаётганимни билдим, тонг отишини эртага ўқийсиз.

Нодирхўжа Юлдашев
Абу Даби

Дубайдан Абу Дабига, 4-кун кундалиги