Қурилишлар ҳам ҳудди шу тартибда. Бу ерда асосан Ҳиндистон, Покистон, Бангладеш ва Филиппиндан келган халқ ишлайди. Кеча тунда ҳаво салқин эди. Футбол ўйнашлик ҳаво. Аммо бугун бундай бўлмайди, намлик даражаси 57 даражага чиқади. Кечагидан 27 даража кўп.
Хабарингиз бор, Алишер Никимбаев бугунда БААда фаолият олиб боряпти. У киши билан боғланиб, салом алик қилдим. Ўйинга аккредитацияни қаердан олишимни сўрадим. У киши кулганча, қанақа аккредитация, бу ерда кириб чиқиш “ВИП” дедилар. Мен Тошкентда ўзим учун иккита расм олиб олган эдим. Ҳақиқатдан ҳам БААда кўп нарса юзаки. Пул бор, шароит бор, лекин футбол улар учун шунаки хобби. Улар учун энг муҳими туялар соғ бўлиб турса бўлганию туя ва от пойгасини ҳеч нимага алмаштирмайдилар. ТВни ёқсангиз ҳам туя пойгаси, шаҳарлар ўртасидаги катта йўлдан юрсангиз ҳам туя. Аммо футболга яратилган шароитни бир сўз билан ифода этиб бера олмайсиз. Кундалик нашрларни кузатиб боряпман, ҳозирча у ерда Ўзбекистон терма жамоасининг ўйинлари ҳақида гап сўз йўқ.

Ҳуллас, ўйин вақти ўзгарганлиги учун терма жамоамиз соат 18:00да машғулотга кетадиган бўлди. Айнан шу вақтда терма жамоамиз меҳмонхонадан чиқиб кетиши лозим эди. Аксига олиб соат 17:00дан 18:00га қадар, Дубай такси хизматида навбат алмашиш жараёни бўлар экан, такси тўхтатишимга 30 дақиқадан кўп вақт кетди денг. 10 дақиқалик йўлни босиб ўтишингиз учун 1 соатдан ортиқ вақт сарфладим. Борсам, терма жамоа режадан 5 дақиқа аввал "The Seventh" стадиони томон йўлга чиқиб кетган экан. 35 км масофа узоқликдаги стадионга такси тўхтатиб етиб олдим. Стадион Дубай – Абу Даби шаҳарларини боғлаб турувчи “бетонка” йўлда жойлашган экан. Бир деганда етиб олдим. Бахтимга терма жамоамиз ҳали машғулотларни бошлаб улгурмаган эди.

Стадионни жойлашуви ҳудди Муборакдаги аренага ўхшайди. Йўл юрасиз, мўл юрасиз бирданига стадион чиқади. Муборакдан фарқли равишда бу ердаги стадион атрофида на яшаш жойи, на кафе бор. Фақат стадион. Стадион 2008 йил фойдаланишга топширилган. 50 000 томошабинни ўз бағрига сиғдира оладиган спорт коплексида “Арсенал”нинг Дубайдаги академияси иш бошлаган.

Стадионга кириб келар экансиз, табиий чимдан иборат бир нечта стандарт ва мини майдонларни кўрасиз. Дилингиз яйрайди. То асосий майдонга юриб борар эканман, шу майдонларни Ўзбекистонда тасаввур қилдим.

Қани эди Тошкентда, марказда мана шундай катта футбол академияси қурилса. У ерда, ҳар бир вилоятнинг энг сара ёш футболчиларни жамлаб, ҳар бир вилоят учун марказлашган ҳолда футболчи етказиб турса. Дейлик, “Навбаҳор”да ўз академияси йўқ, бўлса ҳам рақобат учун вилоятда уларга мос рақиб йўқ. Узоқ муддатга мазкур академиядан ўзига ижара учун жой олади. Ва республика бўйлаб селекция ишлари билан шуғулланади. Марказда тобланаётган футболчи, ҳуқуқий жиҳатдан клубга тегишли бўлади. Менимча гапларимни ўзимдан бошқа ҳеч ким тушунмаётган бўлса керак, лекин катта миллиардлик бу лойиҳа ҳақида ўйланиб, энг яхши таклифлар қабул қилинадиган бўлинса, менимча ёмон бўлмайди.

Яна бир фикр шу жойига каллага келди. Олий лиганинг деярли ҳар бир клуби давлат томонидан пул билан таъминланади. Бу пулларнинг кўп қисми нотўғри йўлларга ишлатиляпти. Мазкур академия очилди дейлик. Ҳар бир клуб мажбурий равишда 1 миллиард сўмни ўзини 100 нафарга яқин тарбияланувчисини футбол сабоқларини ўрганишига ажратади. Бари бир бу пуллар йўқ бўлиб кетяпти. Яхшиси кейинги 10 йиллик учун инвеститция киритиш керак. Кейин 12 вилоятни жамлаган академия ўртасида йил бўйи расмий мусобақалардан тортиб, ўртоқлик учрашувларигача, шунингдек фестиваллар ўтказилинади. Дунёнинг турли мамлакатларидан скаутлар келади. Менимча, жуда катта нарсани ҳаёл қилиб юбордим. Лекин сал ўйланг, амалга оширса бўладиган иш. Менимча келажак лойиҳаси. Бу билан биз ўсмирлар терма жамоамизни ҳам келажагини таъминлаган бўлар эдик.

Яратилган шароитда озим очилиб терма жамоамиз билан ортга қайтдим. Бизни меҳмонхонада Алишер ака кутиб турган эканлар. Шароитлар аъло-ку, десам, бу ўрта ҳолику деб кулиб жавоб бердилар ва мазкур мажмуа “Арсенал” билан ҳамкорликда БАА ўсмирларини катта футболга тайёрлаши ҳақида айтиб ўтдилар.

Шундан кейин академия ҳақида қисқа маълумотлар билан қизиқдим. Билсам, бу ерда “Арсенал” футбол мактаби тарбияланувчиси, 1992-97 йилларда жамоа шарафини ҳимоя қилган Ян Саллей бошқарувчи лавозимида фаолият олиб борар экан.

9 октябрь, 2014 йил. БАА, Дубай
Нодирхўжа Юлдашев

Дубайдан ёзамиз. 2-кун кундалиги. “Арсенал” академиясига ташриф