Хўш, бу сафар нима бўлади? Австралия навбатдаги ЖЧда қандай натижа кўрсатади? ОФК сайти ходимлари бу борада 15 йилдан бери журналист сифатида ишлаб келаётган Себастьян Хассеттга мурожаат қилишди. Ушбу журналист Sydney Morning Herald нашрида, шунингдек, SBS телеканалида ҳамда The World Game веб-сайтида фаолият юритмоқда.

- Австралияни навбатдаги жаҳон чемпионатида нима кутмоқда?
- Жаҳон чемпионатига бориш ҳаммага ҳам насиб этавермайди. Бу дунёдаги энг катта мусобақа. Қуръа ташланганидан сўнг терма жамоамиз гуруҳдан иккинчи ўрин билан чиқса керак деб ўйлагандим. Лекин мундиалга оз қолганида мураббийлар штабида юз берган ўзгариш, Берт ван Марвейкнинг келиши воқеалар ривожини тубдан ўзгартириб юборди. Шундай экан, буёғига нима бўлишини айтиш қийин.

- Жаҳон чемпионатида муносиб иштирок этиш учун нима қилиш керак?
- Австралиянинг ҳимоясида муаммолар бор, айниқса чап ва ўнг қанотда. Агар жамоа бу муаммони ҳал қилмаса мундиалда катта қийинчиликка дуч келади. Ҳатто жамоа сардори Майл Единак ортга қайтиб ўйнагани билан барибир қанот ҳимоясида бўшлиқ кузатиляпти.

- Қайси футболчи ҳамманинг диққат-марказида бўлади?
- Мэт Райан охирги йилларда катта ўсишга эришди. У ажойиб дарвозабон. Мэт ЖЧ саралаш баҳслари ҳамда Осиё Кубогида ўзини ҳар томонлама кўрсата олди. У Бельгия, Испанияда фаолият олиб борди. Энди бўлса Англияда ҳам ўзини кўрсатишга интиляпти. Менимча, ушбу мусобақада терма жамоанинг асосий футболчиси айнан Мэт Райан бўлади.

- Қайси жаҳон чемпионати кўпроқ ёдингизда қолган?
- Албатта, 2006 йилги мундиал. Ахир биз гуруҳдан чиқишни уддалагандик. Гуруҳимиз кучли эди: Бразилия, Хорватия, Япония. Аммо биз вазифани уддалай олганмиз. Айниқса Харри Кьюэллнинг Хорватия дарвозасига киритган тўпи ҳамон ёдимда.

- Ўтмишда ўйнаганлардан ким ҳозирги жамоага мос тушган бўларди деб ўйлайсиз?
- Австралияга жаҳон даражасидаги футболчи етишмаяпти. Шундай футболчи керакки, исталган пайтда ўйинни ўзгартира олсин. Жамоамизда олдин шундай футболчи бор эди: Марк Видука. Аммо ҳозир йўқ. Ўйлашимча, Видука ҳозирги жамоага жуда мос тушган бўларди.

- Сизнингча, Австралиянинг бошланғич таркиби қандай кўринишда бўлади?
- 4-2-3-1 схемаси бўйича ўйнасак керак. Дарвозабон: Мэт Райан. Ҳимоя: Азиз Бехич, Мэтью Журман, Трент Сейнсбури, Жош Рисдон. Ярим ҳимоя: Майл Единак, Аарон Муй, Робби Круз, Том Рогис, Мэтью Леки. Ҳужум: Томи Журич.

- Гуруҳ ўйинларида тахминингиз?
- Францияга ютқазамиз 0:3, Данияга ҳам ютқазамиз 1:2, Перу билан 1:1 ўйнаймиз.

Эксперт таҳлили: Австралия