- Дастлабки бўлимнинг 10-15 дақиқасини яхши бошладик. Тўп назорати бизда бўлди, яхши вазиятлар яратгандик, афсуски улардан фойдалана олмадик. 15 дақиқаликдан кейин "Бунёдкор" ўз устунлигини кўрсатишни бошлади. Узоқдан кўп зарбалар беришди. Таркиби ёш бўлса ҳам "Бунёдкор"да ижрочилар кўп. Уларга қарши ёпиқ ўйин кўрсатмасак бўлмасди, шу сабабли ёпилиб ўйнадик. Иккинчи бўлимда мухлисларбоп ўйин бўлди. Тўп гоҳ уларда гоҳ бизда бўлди. "Бунёдкор" ҳам биз ҳам ютиб кетишимиз мумкин эди. Йигитларга раҳмат айтаман, улар меҳнат қилишди. Жисмоний жиҳатдан ўйинга тайёр эмаслигимиз сезилиб қолди, чунки давралар оралиғида жамоага қўшиб олинган футболчилар биринчи даврада ўз жамоаларида деярли майдонга тушмаган. Шу сабабли бугун жисмоний ҳолатдан қийинчилик бўлиб қолди.

- Жамоанинг қизил карточкагача ва қизил карточкадан кейинги ўйини ҳақида нима дея оласиз? Чунки жамоа чарчаб қолгани сезилди ва янги келиб қўшилган футболчилар ўйинга қўшилиб кета олишмади.

- Ҳозир шуни таъкидлаб ўтгандим. Пўлатхўжа Холдорхонов биринчи даврада кам ўйин амалиётига эга бўлган. Икки ўйиндан буён 90 дақиқадан буён ҳаракат қилмоқда. Унда чарчоқ аломатлари сезилиб қолди. У бирга-бир вазиятларда рақибларини алдаб ўта олади. Жасур Ҳакимовнинг жамоага келиб қўшилганига 5 кун бўлди, унинг жароҳати бор эди. Аста-секинлик билан унинг жисмоний ҳолатини тиклаб боряпмиз. Келгуси ўйинларда у жамоамизга ёрдам беради.

- Давралар оралиғида "Шўртан" кўп футболчиларни қўйиб юборди ва кўп футболчиларни олиб келди. Бу жамоанинг жамоавийлигига путур етказмайдими? Барибир янги футболчиларнинг жамоага кўникиб олишлари учун вақт керак бўлади.

- Ҳа, албатта вақт керак. Биз ижрочиларни олишга ҳаракат қилдик. Тўғри футболчиларнинг жамоага қўшилиб кетишлари вақт талаб қилади. Аҳамият берган бўлсангиз "Олимпик"да бирга ўйнаган футболчиларни олишга ҳаракат қилдик. Машғулотларда ҳам улар бир-бирини яхши тушуниши кўриниб турибди. Бугун бошқачароқ тактика қилдик, ўйинни яхши бошлагандик. Футболчилар кўрсатмаларни бажараётганди. Бизда муаммо бўлаётгани - футболчиларнинг жисмоний ҳолати. Жамоадагилар бир-бирини тушуниб олишлари учун кўп вақт керак эмас. Уч-тўрт ўйинда барчаси ўрнига тушиб кетади.

Элдор Мойлиев: "Биз ҳам "Бунёдкор" ҳам ғалаба қозониб кетиши мумкин эди"