Биз учун аҳамиятлиси, ҳамюртимиз Элдор Шомуродовнинг Италия чемпионатидаги ажойиб ҳаракатлари бўлди. Сурхондарёлик футболчи кузда Ростовдан Апеннин сари йўл олар экан, унинг топ-лигада ўйнаб кета олишига шубҳа қилганлар талайгина эди. Бироқ, Шомуродов нафақат ўйнади, балки "Элдорадо"га айланди.

23 май куни Элдорнинг мавсум давомида Эдин Жеко ("Рома"), Оливье Жиру, Тимо Вернер (ҳар иккови — "Челси"), Усмон Дембеле ("Барса"), Мауро Икарди (ПСЖ) ҳамда Алексис Санчесдан ("Интер") кўпроқ гол ургани ҳақида маълумот бергандик.

Бугун Италиянинг "La Gazzetta dello Sport" нашри ўз таснифига кўра А Сериянинг ўтган мавсумда яхши ўйнаган футболчилар юзлигини эълон қилди. Унда кучли ўнлик қуйидагича кўриниш касб этган:

1. Ромелу Лукаку ("Интер")
2. Франк Кессье ("Милан")
3. Криштиану Роналду ("Ювентус")
4. Луис Муриель ("Аталанта")
5. Николо Барелла ("Интер")
6. Родриго де Пауль ("Удинезе")
7. Златан Ибрагимович ("Милан")
8. Лоренцо Инсинье ("Наполи")
9. Ашраф Ҳакими ("Интер")
10. Ремо Фройлер ("Аталанта")

Элдор Шомуродов эса рейтингнинг 85-поғонасига жойлаштирилган. Эътиборли жиҳати, 8 та гол урган форвард "Интер"нинг чемпионлигига муносиб ҳисса қўшган Самир Ҳанданович, итальян футболининг сўнгги 10 йилликдаги энг кучли ҳимоячиси Жоржо Кьеллини, "нерадзуррилар"нинг қимматбаҳо ярим ҳимоячиси Кристиан Эриксен ҳамда афсонавий Франк Риберидан юқорироққа жойлашган.

Маълумот учун, А Сериянинг ўтган мавсумида 554 нафар футболчи майдонга тушди. Улардан 336 нафари легионерлар ҳисобланади.

Ф.Р.

Элдор Рибери, Эриксен ва Ҳандановичдан юқорида!