Бир неча кун аввал "Рома" клуби ҳужумчиси Элдор Шомуродов Ўзбекистон миллий терма жамоаси йиғинлари доирасида ўзининг Италиядаги фаолияти ҳақида интервью берганди. Бу суҳбат итальян нашрларигача етиб борди.

Италиядаги жуда кўп нашрлар Элдорнинг ушбу интервьюсини "Агар "Рома" сафида майдонга тушмасам, унда клубдан кетаман" сарлавҳаси остида чоп этишди.

Ҳамюртимиз Элдор Шомуродов эса ушбу хабарларга ўз инстаграм саҳифасида итальян тилида изоҳ берди:

"Ҳаммага салом. Менинг таржима қилинган интервьюларимнинг бирида агар "Рома" сафида ўйнамасам, клубдан кетишга тайёрлигим ҳақида айтилган. Мен ҳеч қачон бундай демаганман. "Рома"нинг бир бўлаги эканлигимдан мамнунман ва ҳар куни ўз устимда яхшироқ ишлашни хоҳлайман. Шу орқали жамоадошларим ва мураббийга кўпроқ ёрдам бермоқчиман", -деб ёзади Элдор Шомуродов.

Ўша интервьюнинг ўзбек тилидаги асл кўринишида қўйидаги сўзлар айтилганди:

- Режангизда кейинги мавсум ҳам "Рома"да қолиш нияти борми?
- Клуб билан амалдаги шартномам бор. Агар ўйнайдиган бўлсам қолишни хоҳлайман, лекин кўп вақт захирада ўтириш ниятим ҳам йўқ.

Қуйидаги видеода Элдор Шомуродовнинг сўзларини эшитиб, вазиятга ўзингиз баҳо беришингиз мумкин:

Элдор Шомуродов: "Моуринью билан муносабатим бошидагидек эмас, лекин..."

Элдор Шомуродов ўзбек тилида берган интервьюсини бошқа маънода талқин қилган итальян нашрларига раддия берди