Биринчи давра охирларида “Бунёдкор” футбол клубига Элдор Шомуродов трансфери масаласида Россиянинг “Ростов” клубидан таклиф тушди. Олиб борилган музокаралардан сўнг Элдор Шомуродов “Бунёдкор”дан “Ростов”га ўтди.

Айтиш жоизки, “Бунёдкор” футбол клуби ўз таркибидаги футболчиларининг бизникидан кучлироқ бўлган хориж чемпионатларига йўл олишига доимо ижобий муносабатда бўлиб келади. Ўйлаймизки, Элдор Шомуродов Россия премьер-лигасида тўп тепиб, орттирадиган тажрибаси ва маҳорати келажакда Ўзбекистон миллий терма жамоаси учун фойдали бўлади. Шомуродов сўнгги йилларда премьер-лига баҳсларида ўз ўрнига эга бўлишган Одил Аҳмедов, Виталий Денисов, Вадим Афонин сингари ном қозониб, Россия чемпионатида муносиб иштирок этади. Қайд этиш керакки, Элдор Шомуродов "Бунёдкор" ФКдан Россия чемпионатига йўл олган ўзбекистонлик биринчи футболчи бўлди.

“Бунёдкор” футбол клуби академияси эса янгидан-янги юлдузларни кашф қилишда давом этади. Ўйлаймизки, футбол мактабимизда тарбия топаётган ёш футболчилар учун Шомуродовнинг “Ростов”га ўтиши қўшимча куч бағишлаб, уларнинг ўз устиларида янада кўпроқ ишлашига ва келажакда моҳир футболчи бўлиб етишишига туртки бўлади.

Россиядаги фаолиятинг омадли бўлсин, Элдор!

Элдор Шомуродов “Ростов”га ўтди