- Фикримча, ўйин жанговар ўтди. Яхши техникали футболчиларимиз кўп бўлганлиги сабабли биринчи бўлимда тўпни ушлаб тура олдик. Иккинчи таймда ҳам ёмон ўйин кўрсатганимиз йўқ. Қаршимизда Ўзбекистоннинг кучли жамоаларидан бири - "Пахтакор" эди. шу сабабли жанговар ўйнадик. Йигитлар учун хафаман. Улар бу ўйинга ўзларини баҳш қила олишди. Ҳечқиси йўқ. Кубок варақларини ёпамиз ва чемпионатга эътиборни қаратамиз.

- Мавсум бошидан буён жамоангизда гол урадиган футболчи топилмаяпти. Бундай муаммони қай тариқа бартараф қилмоқчисиз? Шундай футболчи жалб қилса бўлармиди?

- Ҳаммаси босқичма-босқич бўлади. Биз вазиятлар ярата оляпмиз. Футболда бундай ҳолатлар бўлиб туради деб ўйлайман. Тўғри, вазиятлардан фойдаланишда оқсаяпмиз. Агар хотиржам таҳлил қилсак, Франеда, Музаффарда имкониятлар юзага келди. Агарда голга тортадиган вазиятлар яратмаётганимизда бошқа гап эди. Биринчи даврада бу борада камчиликларимиз кўзга ташланганди. Биз учун кейинги қадам реализация ҳисобланади. Мураббийлар штаби бу борада иш олиб боришади.

Ўйинда асосий эътиборни илк дақиқаларга қаратдик. Агарда айрим вазиятларда совуққонроқ бўлганимизда эди, вазиятни ҳал қилиб кетардик. Иккинчи бўлимнинг сўнгги дақиқасида ҳам гол уриш имкони пайдо бўлганди. Йигитлардан миннатдораман.

- Асадбек Раҳимжоновнинг ўйини ҳақида нима дея оласиз?

- У ўз ёшига кўра иқтидорли футболчи. Нафақат Асад, Амир Тўрақулов, Азизбек Тўлқинбековларни ҳам айтиб ўтишим мумкин. Асадбек Раҳимжонов универсал футболчи, у сўнгги ҳимоячи, таня зонасида ҳам ўйнай олади. "Андижон" билан ўйинда Рашо жароҳат олди ва сафдан чиқди.

- Ротациялар айнан кубок учрашуви бўлгани учун амалга оширилдими ёки бошқа сабабми?

- Кубокда юришимизни давом эттиришни жуда истагандик. Ўзбекистон кубоги обрўли мусобақа. "Андижон" билан ўйиндан сўнг "Пахтакор"га қараганда бизда бир кун кам дам олиш имкони бўлди. Бу борада олтин ўрталикни топишга уриниб кўрдик. Жамоамизда рақобат кучайди. Асосий ёки захира ўйинчиси деган гап йўқ. Олдинда Наманганда қийин ўйин кутиб турибди.

- Элдор Шомуродов ҳақида фикрингиз қизиқ. Унинг учун қайси вариант қулайроқ? МЛС ёки Италия?

- Шахсан мен Элдор Шомуродовнинг мухлисиман. У Италияга келганида хурсанд бўлганман. "Женоа"да ўйнашни бошлади. Ўзаро танишдик, омад тиладим. У Италияда фаолиятини давом эттирганида янада яхшироқ бўларди. Энди бу унинг танлови ҳисобланади. Ҳар бир футболчи қарорни ўзи қабул қилади. Элдорга фақат омад тилайман.

Элдор Шомуродов учун қайси вариант қулайроқ? Илёс Зейтуллаев фикрини айтди