Ўйиндан кейинги матбуот анжуманида "Ал Ваҳда" бош мураббийи ва учрашувнинг "Энг яхши футболчиси" Фавор Огбу иштирок этди.

- Мураббийга савол: ўйин ҳақида фикрингиз?

- Ўйин биз кутгандек яхши кечди ва ғалаба қозондик. Бугун ким учундир адолатли, ким учундир адолатсиз ҳисоб бўлди. Футболда доим шундай бўлади. Бугунги ғалабамизнинг асосий сабаби интизом ва характерда деб ўйлайман. Чунки 0:1 ҳисобида ортда бораётгандик. Бундан чиқиб кетиш осон бўлмади. Иккинчи таймда иккита стандарт вазият баҳс тақдирини ҳал қилди. Баъзи футболчиларимиз бу учрашувда иштирок эта олмади, лекин майдонга тушганлар уларнинг йўқлигини билдирмади. Иккинчи таймда ўйин янада босимли кечди. Биз таваккал олдинга югурмасдан ўз пайтимиз келишини кутдик, футболчилар бир-бирларини қўллаб туришди. Жамоам ўсишда давом этяпти, бу эса ёқимли ҳиссиётларни беради. Ўйлашимча, "Насаф"нинг бугун шунчаки омади келмади. Уларда ҳам гол уриш учун имконият бўлди. Жамоада яхши футболчилар кўп экан. Шундай бўлдики, бугун уман гол урмаган футболчимиз тўп киритди, бу ҳам омадимиз келганидан.

Фавор Огбу:

- Мен Қаршига келганимдан хурсандман. Ўйиндан ва ғалабадан ҳам хурсандман.

- Футболчига савол: бугунги гол тасодифми ё омадми?

- Ўйлайманки, бу меҳнат самараси.

- Бош мураббийга савол: Танаффусда футболчиларни ғалабага қандай ишонтирдингиз?

- Биз яхши ўйин намойиш этаётганимизни айтдим. Футболчилар бир-бирларига кўп марта тўп узатишди, лекин зарба берадиган топилмади. "Насаф" зарба бериб гол урди. Бизга шу нарса етишмаётганди. Шундан сўнг мен ҳам футболчиларга зарба бериш кераклигини уқтирдим. Фақат пас берган билан иш битмайди, ғалаба қозониш учун гол уриш керак. Баъзан футболчилар буни эшитмайди, баъзан эшитишади. Бугун ҳартугул эшитишди.

- Агар дуранг натижа қайд этилганида, бу сиз учун қониқарли бўлармиди?

- Биз ғалаба учун ҳаракат қиламиз, чунки ҳар бир қўлга киритилган уч очко жамоани юқорига кўтаради. Диққат эътиборни ютуққа қаратдик. Бунинг учун ҳамма қаттиқ меҳнат қилди. Шуни айтишим мумкин, ютуққа эришиш осон бўлмади.

- "Ал Ваҳда" Элит ОЧЛ финалигача етиб бора оладими?

- Иншооллоҳ, шунга умид қиламиз. Финалга чиқиш бизнинг орзумиз. Тўғри йўлдамиз, лекин ҳали манзил узоқ. Элит Осиё чемпионлар лигаси жуда яхши турнир, бу ерда кучли жамоалар кўп. Биз аввало биринчи босқичдан ўтиб олишни ўйлашимиз керак. Мусобақани ютаман деган жамоалар кўп, биз ҳам шулардан бири бўлишни хоҳлаймиз.

Элит ОЧЛ. "Ал Ваҳда" бош мураббийи Жозе Мораиш: "Ғалабамизнинг асосий сабаби интизом ва характерда деб ўйлайман"