"Ал Жазира" бош мураббийи Эрик Геретц матбуот анжуманлари залига кириб келди ва энди учрашувдан кейинги фикрлари билан ўртоқлашади.

"Ўйин жуда яхши ва томошабоп кечди. "Бунёдкор" жуда кучли рақиб ҳисобланади. Биринчи бўлимда тўпни кўпроқ ўз назоратимизни ушлаб туришни истадик. Иккинчи таймда эса ҳужумкор футбол намойиш этишга ҳаракат қилдик. Қизил карточка кўрсатилган вазиятни кўриб чиқишни истардик. Менимча, бу вазиятда ҳакам нотўғри қарор қабул қилди. Уларни дарвозабонига ҳам пенальти бўлган вазиятда қизил карточка кўрсатилиши керак эди", - дея ўз сўзларини бошлади Эрик Геретц.

- Кеча "Бунёдкор" футболчиларини алоҳида таъкидлаб ўтишни истамагандингиз. Энди ўйиндан сўнг ўзизга манзур бўлган футболчиларни исмини айта оласизми?

- Рақиб бугун жамоавий ўйин кўрсатди. Бу ерда бирдамлик кўпроқ иш берди. Шу боис рақибни кучли жамоа сифатида айта оламан. Ҳеч кимни ажратиб кўрсатмоқчи эмасман.

- Бугун "Ал Жазира" негадир ўз даражасида ўйнай олмади?

- Ўйлашимча, ёмон ўйин кўрсатмадик. Биринчи ва иккинчи бўлимда ҳам футболчиларим яхши ҳаракат қилишди.

- Мирко Вучинич бугун нафақат асосий таркибда, балки ўйин қайдномасидан ҳам жой олмади. Бунинг сабаби нимада?

- Мирко Вучинич сўнгги бир ҳафтада учта учрашувни ўтказган эди. Шу боис унга бироз дам беришни истадим.

Эрик Геретц: "Жамоамиз ёмон ўйнамади"