Унга кўра, турнинг марказий учрашуви бўлиши кутилаётган "Бунёдкор" - "Пахтакор" баҳсини Равшан Эрматов эмас, балки Шерзод Қосимов бошқариб боради. Албатта, нима сабабдан Эрматовнинг Тошкент дербисига қўйилмагани мухлислар орасида ўзига хос баҳс-мунозараларни келтириб чиқарди.

Бошида ўзимиз ҳам ҳайрон қолдик. Наҳотки, Эрматов яна "Пахтакор" иштирокидаги ўйинга қўйилмаса деган хаёлга бордик. Лекин кўп ўтмай барчаси маълум бўлди. Гап шундаки, Равшан Эрматов бригадаси бугун Осиё чемпионлар лигасидан ўрин олган "Ал Ҳилол" - "Ал Райан" баҳсини бошқаради. Саудия Арабистонида бўлиб ўтадиган учрашув бизнинг вақт билан 22:15да бошланади ва "Спорт" телеканали орқали тўғридан-тўғри намойиш этилади.

Эрматов бугунги ўйинни ўтказиб эртага юртимизга қайтиб келади ва 8 март куни бўладиган "Қизилқум" - "Қўқон-1912" баҳсида ҳакамлик қилади. Кейин эса ўйиндан эртасигаёқ 9 март куни Дубайга учиб кетади. Негаки шу куни жаҳон чемпионати ўйинларини бошқариши кутилаётган ҳакамлар Дубайда жам бўлиб имтиҳон топширишади. "Бунёдкор" - "Пахтакор" баҳси 10 март куни ўтказилишини ҳисобга олсак, табиийки Эрматов бу пайт Тошкентда бўлмайди. Шу боис ПФЛ Ҳакамлар қўмитаси уни Навоийда кечадиган ўйинга бош ҳакам этиб тайинлади.

Х.Холиқов.

Эрматов нега дербини бошқармайди?