Эрон олимпия терма жамоаси бош мураббийи Ҳамид Эстили журналистларга берган интервьюсида U-23 Осиё чемпионатига тайёргарлик кўнгилдагидек кетмаётгани ҳақида гапирди.

Маълумот учун, Эрон "C" гуруҳида Ўзбекистон, Хитой ва Жанубий Кореяга қарши баҳс олиб боради. Таиланддаги мусобақа 8-26 январь оралиғида бўлиб ўтади ва кучли учликка кирган жамоалар Токио Олимпиадасига йўлланма олишади.

Ушбу мусобақага тайёргарлик ҳақида эронликлар устози шундай деди:

- "Шанба куни машғулотларни бошладик, лекин машғулотдан умуман кўнглим тўлмаяпти, чунки барча футболчилар сафимизга келиб қўшилгани йўқ. Федерация билан оғзаки келишувга кўра Эрон чемпионати вақтинча тўхтатиб турилиши лозим эди, лекин ундай бўлмади. Ўйинлар ҳамон давом этяпти. Бунинг устига "Истиқлол" ва "Сепахон" ўз ўйинчиларини терма жамоага қўйиб юбормади".

- "20 декабрь куни Доҳага учишимиз керак, лекин таркибимиз тўлиқ эмас. Ўйлайманки, Эрон футбол федерацияси вазиятни тўғри тушунган ҳолда тайёргарлик дастуримизга ўзгартириш киритади. Биз жуда кучли гуруҳдан жой олганмиз. Яхши натижа кўрсатиш учун шунга яраша тайёргарлик кўриш керак. Ҳозир барча жамоалар тўлиқ таркиб билан шуғулланяпти, биз эса муаммолар гирдобидамиз".

Эслатиб ўтамиз, U-23 Осиё чемпионати гуруҳ босқичидан ўрин олган Эрон - Ўзбекистон баҳси 9 январь куни бўлиб ўтади.

Эрон U-23 терма жамоаси мураббийи: "Тайёргарликдан умуман қониқмаяпман"