Испания ва Англия ўртасидаги финал ўйинидан кейин ҳам Евро-2024 мусобақасининг тўпурари аниқланмаса, "Олтин бутса" мукофоти бир вақтнинг ўзида олти нафар футболчига тақдим қилинади. Бу ҳақда УЕФА маълум қилди.

Гап шундаки, айни дамда турнирнинг энг кўп гол урган футболчилари сони олти нафарни ташкил қилади (уларнинг барчаси учтадан тўп киритган). Ҳарри Кейн ва Дани Ольмо финалда ўйнашади. Бундан ташқари, Коди Гакпо (Нидерландия), Жоржа Микаутадзе (Грузия), Жамал Мусиала (Германия) ва Иван Шранцда (Словакия) учтадан гол бор.

УЕФА агарда тўпурарлик пойгасида якка ғолиб аниқланмаса, олтита футболчининг барчасига "Олтин бутса" мукофотини тақдим қилади.

Авваллари турнир тўпурарини аниқлашда қўшимча кўрсаткичларга қаралган бўлса, бу турнирдан фақатгина голлар инобатга олинади.

Евро-2024 якунида ягона тўпурар бўлмаса, "Олтин бутса" кимга насиб этади? УЕФАдан ғаройиб ечим...