Амалдаги чемпион Португалия терма жамоаси сардори Криштиану Роналду чемпионат давомида бир қатор узоқ йиллик рекордларни янгилаши мумкин. “Ювентус” ҳужумчиси янада яхшилаши мумкин бўлган кўрсаткичлар диққат марказимизда.

1. Европа чемпионатида энг кўп иштирок

Криштиану Роналду фаолиятининг кўп қисмини Европа футболи тарихи китобларини қайта ёзишга бағишлаган. Португалия терма жамоаси сафида 5-марта Европа чемпионатининг финал босқичида (албатта, рекорд) қатнашади. У илк бор 2004 йилда Португалия мезбонлик қилган турнирда дебют қилган эди. Якунда кумуш медалларига эга чиққан 19 ёшли Роналду дунёнинг энг яхши футболчиларидан бирига айлана олди.

Шу пайтга қадар 17 футболчи 4 марта Европа чемпионатининг финал босқичида иштирок этган ва уларнинг сўнггиси ҳам айнан Роналдунинг ўзи. Францияда ўтган мусобақада португалиялик футболчи бу натижани такрорлаган эди. Бу йилги чемпионатда у яққол пешқадамга айланиши деярли аниқ!

2. Финал босқичи тўпурари

Роналду 2004 йил 12 июнда Грецияга қарши Евродаги дебютини гол билан нишонлади ва шу вақтдан бери 21 та учрашувда 9 та гол киритган ҳолда Мишел Платини ўрнатган рекордни такрорлади. Франциялик собиқ футболчи ЕВРО-1984 туринирида 9 гол билан тўпурар бўлган эди. Криштиану бу натижага 2016 йилги мусобақа ярим финалида Уэльс дарвозасига киритган голи орқали эришди.

9’ Криштиану Роналду (Португалия)
9’ Мишел Платини (Франция)
7’ Алан Ширер (Англия)

3. Европа чемпионатида энг кўп ўйин ўтказган футболчи

Роналду Жанлуижи Буффоннинг (Европа чемпионати саралаш ва финал баҳсларида энг кўп майдонга тушган футболчи) рекордини янгилашга яқин турибди. Яъни Европа чемпионатида италиялик дарвозабон 58 ўйинда иштирок этган. Криштиану ҳисобида 56 та ўйин мавжуд бўлиб, гуруҳ босқичининг ўзида ушбу натижани янгилаши мумкин.

58’ Жанлуижи Буффон (Италия)
56’ Криштиану Роналду (Португалия)
51’ Марио Фрик (Лихтенштейн)

4. Бир ўйинда киритилган энг кўп гол

Фақат етти нафар футболчи Европа чемпионатида хет-трикка эришган. Бироқ уларнинг орасида Роналду номи йўқ. “Ювентус” форварди терма жамоаси таркибида халқаро ўйинларда 9 бор хетт-трик қайд этган.

Бир ўйинда 4 та гол уриш бироз мураккаброқ. Мусобақа давомида барча футболчи ушбу натижани янгилаши мумкин.

5. Европа чемпионати финалида гол урган энг кекса футболчи

Евро финалида 30 ёшдан ошган битта футболчи гол урган холос. Германиялик Бернд Холзенбейн Чехословакияга бой берилган ўйинда рақиб дарвозасини ишғол этган. Бу натижа янгиланиши учун Роналду финалда гол уриши керак.

6. Европа чемпионлигини энг кўп ютган сардор

Агар Португалия “Уэмбли”даги финалда ғалаба қозонса, собиқ жамоадоши Икер Касильяс (2008 ва 2012) рекордини такрорлайди. Касильяс Испания терма жамоасини кетма-кет икки бор чемпионлик сари бошлаб кела олган.

Криштиану Роналду томонидан Европа чемпионатида ўрнатилган рекордлар

1. Финал босқичида энг кўп ўйин ўтказган футболчи

Роналду шу кунга қадар Европа чемпионатининг финал босқичида 21 ўйинда иштирок этган. Бу борада у яққол пешқадам ва ўз натижасини янада яхшилаш имконияти мавжуд. Унинг энг яқин таъқибчиси Германиянинг собиқ ярим ҳимоячиси Бастиан Швайнштайгер бўлиб, у 18 учрашувда майдонга тушган.

2. Европа чемпионатининг энг яхши тўпурари (саралаш ва финал босқичи)

Португалиялик юлдуз Евро саралаши ва финал босқичларида 40 та гол урган ва кейинги икки ўринни эгаллаб турган футболчилар - Златан Ибрагимович (25) ва Робби Кинлардан (23) анча илгарилаб кетган. Бу натижа узоқ вақт сақланиб қолиши шубҳасиз.

3. Кетма-кет 4 та мусобақада гол урган дастлабки футболчи

Роналду Евро-2004’да иккита гол урди, 2008 йилда битта, 2012 йилда учта ва 2016 йилда яна уч марта рақиблар дарвозасини ишғол қилди. Шу тариқа учта Европа чемпионатида гол урган етти футболчини ортда қолдирди. Бундан ташқари, бир нечта Еврода уч ва ундан ортиқ гол урган ягона футболчи бўлиб қолмоқда.

Қўшимчасига...

ЕВРО-2024 ўтказиладиган вақтда Роналду 39 ёшга тўлади. Ҳар эҳтимолга қарши, Роналду ўша турнирда иштирок этиши мумкинлигини ҳисобга олиб, бир қатор рекордларни эътиборингизга ҳавола этамиз:

Европа чемпионатларининг энг кекса тўпурари
Ивиcа Вастиc (Австрия, 2008) - 38 ёш 257 кун
Европа чемпионатида қатнашган энг кекса футболчи
Лотар Маттеус (Германия, 2000) - 39 ёш 91 кун
Европа чемпионати финалида иштирок этган энг кекса футболчи
Йенс Леманн (Германия, 2008) - 38 ёш 232 кун
Европа чемпионатини ютган энг кекса футболчи
Арнольд Мюрен (Нидерландия, 1988) - 37 ёш 23 кун

Футболдан завқ олиш натижаларга боғлиқ эмаслиги кўп бор таъкидланган, бироқ статистика энг яхшиларни аниқлаш учун ҳисоблаб борилади.

Эътиборингизга Криштиану Роналду томонидан янгиланиши мумкин бўлган айрим рекордларни тақдим этдик холос. Амалда қандай бўлишини эса вақт кўрсатади.

Ҳумоюн Орипов тайёрлади

ЕВРО яқин. Роналду қайси рекордларни янгилайди?