Ушбу баҳсдан сўнг "Қайрат" бош мураббийи Қурбон Бердиевнинг ёрдамчиси Дмитрий Кириченко championat.asia сайтига интервью берди. Маълумот учун, Кириченко Евро-2004да Греция терма жамоаси дарвозасига 67-сонияда гол урган ва ўша гол Европа чемпионатлари тарихидаги энг тезкор гол бўлиб турибди.
- Кўряпмизки, жамоа таркиби анча ёшарди. Давом этаётган йиғин ва ўртоқлик ўйинидаги рақиб хусусида фикр билдирсангиз...
- Ўз чемпионатида 3-ўринда бораётган кучли жамоага қарши ўйнадик. Бу бизнинг биринчи назорат учрашувимиз эди. Бунгача яқин орада ўртоқлик ўйинларида қатнашмагандик, чунки йиғин бошланиш муддати озроқ чўзилиб кетди. Албатта, мағлуб бўлиш ёқимсиз, лекин биринчи баҳсда осон бўлмаслигини билардик.
- Жамоанинг бу даражада ёшартирилиши жамоа юқори ўринлар учун курашишида халақит қилмайдими?
- Йўқ. Ўйлайманки, таркибимиз ёш бўлса-да, жуда иқтидорли футболчилардан иборат.
- Жамоада қизиқарли "трио" барпо бўлди – Гулжигит Аликулов ("Қирғизистонлик Месси"), Еркебулан Сейдахмет ("Қозоғистонлик Месси") ва Жасур Жалолиддинов ("Ўзбекистонлик Месси"). Бу ҳолатни қандай баҳолайсиз? Улар ўзаро чиқишиб кетишадими?
- Айни пайтда таркибимизда ёш, лекин шу билан бирга, жуда иқтидорли йигитлар жам бўлишди. Ўйинчилар бу иқтидорни намойиш этишлари ўзларига ва албатта мураббийларга боғлиқ. Уларда хоҳиш кучли, қилинаётган меҳнат учун раҳмат айтишимиз керак. Ҳозир осон эмас, аммо ҳаммаси яхши бўлади ва секин-аста Мессининг даражасига чиқишади (кулади).
- Норасмий дебютини ўтказган Жасур Жалолиддинов ҳақида фикрларингиз...
- Жасур ўсиши лозим бўлган иқтидор эгаси. У Россияга борди, аммо ўзини кўрсатиш насиб қилмади. Унинг ўйинларини кўрганман. Ҳали барчаси олдинда, астойдил меҳнат қилиб, ривожланиш керак.
Изоҳлар