Бу ўйинларга мураббийлар, футболчилар ва мухлислар алоҳида тайёргарлик кўради. Милан дербиси, Манчестер дербиси, Лондон дербиси...Ҳаттоки Истанбул ва Теҳрон дербилари ҳам жуда “қайноқ" ўтади. Теҳрондаги "“Озоди" стадионига "Истиқлол" ва "Персеполис" жамоалари ўртасидаги ўйинга 100 мингга яқин мухлислар киради.

Бизда бугун Ўзбекистон Про лигасида ана шундай дербилардан бири Яйпандаги "Ўзбекистон" стадионида бўлиб ўтади. Бу ўйинга ҳам қизиқиш ўта юқори. Биринчи сабаби дерби эканлиги. Иккинчи сабаби ҳар иккала жамоа ҳам ўтган турда мағлубиятга учраб очко йўқотгани, бугун иккаласи ҳам фақат ғалаба учун майдонга чиқади. Учинчи сабаби мураббийлар. Ҳар иккала жамоани ҳам футболчилик даврида "Нефтчи" билан кўплаб ғалабаларга эришган, бир-бири билан ака-укадек бўлиб қолган, Хиросима-94 чемпионлари Абдусамад Дўрмонов ва Сергей Лебедев бошқараётгани. Бу иккала мураббийни ўзаро рақиб сифатида кўриш ўйинга бўлган интригани янада ошириб юборади.

Хуллас минг марта ўқигандан бир марта кўрган яхши. Бугун соат 16:30 дан бошланадиган Фарғона дербисини championat.asia сайтида ва "Футбол ТВ" телеканалида кузатиб бориш мумкин.

Фарҳоджон Узоқов

Фарғона дербисига ўзгача анонс