"Темирйўлчилар"нинг янги аъзоси Фарҳод Бекмуротов кеча ёшлар лигасида "Локомотив" сафида дебют учрашувини ўтказди. Ушбу баҳсдан сўнг Бекмуротов ўз фикрларини билдириб ўтди.

"Хабариз бор, ўтган йили биринчи лигада иштирок этган "Андижон" жамоасида фаолият олиб бордим. Мавсум якунига етганидан сўнг, бироз дам олдим. Шерзод Райимжонов менга қўнғироқ қилди ва Андрей Фёдоров сизни сўраябди, телефон рақамингизни бераман, қўнғироқ қилиб гаплашин, деб айтди. Виталиевич, келиб ўзингни синаб кўр, мураббийларга ёқсанг жамоада қоласан, деб айтди. Ҳеч иккиланмасдан таклифни қабул қилдим ва Тошкентга келдим. Шундан сўнг, мураббийларга ўйиним маъқул келган бўлса керак, шартнома имзоладик. Кеча ёшлар лигасида "Локомотив" таркибида дебют учрашувимни ўтказдим. Жамоадошларим билан яхши чиқишиб кетдим. Биринчи бўлиб биз дарвозамиздан тўп ўтказиб юбордик. Аслида биз рақибларимиздан кучсиз эмас эдик.

Бироз омад етишмади. Стадионга кўплаб мухлислар ташриф буюришди. Мухлисларга бўлиб ўтган ўйин ёқди деб ўйлайман. Ҳар ҳолда учрашувни охирги дақиқаларигача кузатиб ўтиришди. Бу йилги чемпионат баҳслари ўзгача ўтишига умид қиляпман. 12та кучли жамоа, ўйиндан олдин қандай натижа қайд этилишини башорат қилиб бўлмайди. Ҳар бир учрашувга кучли тайёргарлик кўриш керак. ОЧЛ мусобақасига заявка топиширга мураббийлар улгуришмади, деб ўйлайман. Насиб қилса гуруҳ босқичидан чиқсак, мени ОЧЛда ўйнашим учун заявка қилиши мумкин. 2016 йили олий лига баҳсларида 28та учрашувда тўлиқ майдонда ҳаракат қилдим.

шундан сўнг, "Андижон" биринчи лигага равона бўлди. Шундай пайтда "Андижон"ни ташлаб кетмадим. Жамоани олий лигага олиб чиқиб кейин бошқа жамоага ўтишни мақсад қилгандим. Лекин биз ўйлаган нарса ҳар доим ҳам бўлавермас экан. Афсуски, суперлига йўлланмасини қўлга кирита олмадик. Мана энди суперлигада ўйнашим учун имконият яратилди. Бунинг учун "Локомотив" раҳбарияти, мураббийлар штабини ишончини оқлашга ҳаракат қиламан. рақобат бор жойда ўсиш бўлади. Тўғри, "Локомотив" таркибида маҳоратли футбочлилар кўп. Ҳар куни улардан ниманидур ўрганишга ҳаракат қиляпман. Машғулотларда тинмай тер тўкиб, асосий таркибда майдонга туширишларини кутаман. Насиб қилса ҳаммаси яхши бўлади", - дейди Фарҳод Бекмуротов

Жаҳонгир Сотволдиев суҳбатлашди

Фарҳод Бекмуротов: "Оғир вазиятда "Андижон"ни ташлаб кетмаган эдим"