"Узоқ танаффусдан сўнг расмий ўйинда майдонга тушдик. Бу яхшими ёки ёмонми, билмаяпман. Ўйиндан-ўйинга муддат узоқ бўлиб кетяпти. Футболчиларни ўйин ритмида ушлаш бироз қийин бўляпти. "Локомотив"ни яхши ўрганиб чиққан эдик, тан оламан, муносиб жамоа. Таркибида яхши савиядаги футболчилари бор. Мураббийлар штаби ҳам таниш ва тажрибали. Жамоавий ўйини, маҳоратли футболчилари бор. Кучли рақибга муносиб қаршилик қила олдик. Ўйин бошланиши режамиз асосида кетаётганди, кейин стандарт вазиятдан гол ўтказиб юбордик. Муаммолар юзага кела бошлади. Умуман олганда, йигитларга раҳмат — курашишди, вазиятлар яратишди", — дейди Фарҳод Нишонов.

— Ўйин дурангга мос бўлдими?
— Ғалаба қозонишни режа қилган эдик, чунки иккинчи бўлимда устунлик қилдик. Биз тажрибали ва маҳоратли футболчиларга муҳтожмиз. Агар вазиятлардан фойдаланганимизда, ғалаба қозонар эдик.

— Бу мавсум "Олимпик-MobiUz" чемпион сифатида Суперлигага йўл олмаса, буни муваффақиятсизлик сифатида ҳисоблайсизми?
— Агар Суперлигага йўл ололмасак, бу ёшдан сўнг бундай йигитларни йиға олмаймиз. Элитага чиқсакгина кучли таркибни сақлаб қолишимиз мумкин. Суперлигага йўлланма ололмасак, таркибни сақлаб қола олмаймиз. Суперлигага чиқишимиз керак, биз ҳаракат қиламиз.

— Турнир жадвали тиғиз кўринишда. "Арал" пешқадам бўлиб олди. Жадвал ҳақидаги фикрингиз қандай?
— Учта жамоа бир-бирига яқин. Бу кураш охиригача давом этади. "Арал"нинг ҳам ўзига яраша ўйин услуби бор, уларнинг майдонида ўйнаш жуда қийин. Биз охиригача курашамиз.

— Қизил карточкалар ҳақида...
— Буни кўриб чиқиб таҳлил қилиш керак. Ўйлашимча, қизил карточкалар тўғри қарор бўлди. "Локомотив" футболчиси агрессивроқ ҳаракат қилди.

— Про лигага ВАР керакми?
— Албатта, керак. Кўряпсизки, баҳсли вазиятлар кўп бўлмоқда. ВАР қўлланилса, тўғрироқ бўлади.

Фарҳод Нишонов: "Про лигага ВАР албатта керак"