Хайрулла Абдиев бошқарувидаги жамоа бу йилги турнирни ҳам ғалаба билан бошлади. “С” гуруҳидан ўрин олган “Обод” бугун элита вакили “Навбаҳор”ни мағлуб этди. Учрашувдан сўнг клуб директори Фарҳод Сафаров билан суҳбатлашдик.
- Ёдингизда бўлса ўткан йили ПФЛ Кубогида финалга қадар етиб боргандик –дея гап бошлади Сафаров. – Мақсадимиз камида шу натижани такрорлашдир. Бу йўлда йигитлар астойдил харакат қилмоқда.

- “Навбаҳор”га қарши кечган ўйин ҳақида фикрингиз қандай?
- Ўйин яхши ўтди. Футболчиларимизда ғалаба учун иштиёқ юқори эканлигини кўриш мумкин эди. Футболда бу жуда муҳимдир.

- Олий лига вакили нимани эвазига мағлуб этилди?
- “Навбаҳор” ҳам жиддий қаршилик кўрсатди. Лекин битта гол ўйин тақдирини ҳал қилди.

- Жамоангиз ўрин олган гуруҳ ҳақида нима дейсиз?
- Бемалол айта оламанки, “ўлим” гуруҳи! Эътибор беринг бизнинг “С” гуруҳда олий лига жамоалари ўрин олган. “Навбаҳор”, “Шўртан”, “Локомотив” ҳамда “Обод”. Бу биз учун ҳам қизиқарли бўлади.

- “Обод”ни янги мавсумга кўраётган тайёргарлигидан кўнглингиз тўляптими?
- Албатта. Ҳаммаси режадагидек кетмоқда. Муносиб равишда ҳозирлик кўришимиз учун етарли шароитлар яратилган. Умид қиламанки, чемпионатга қадар йигитлар янада ўсишга эришади.

- Таркибда ҳам ўзгаришлар қилинаётганини кўряпмиз...
- Ҳа, ўтган йилгига нисбатан бу йил таркибни янада кучайтириб рақобатни оширмоқчимиз. Ўйлайманки таркибимизга биринчи лига тоифасидаги маҳоратли ўйинчилар қўшилмоқда.

- Кўпчилик мухлислар эндиликда “Обод”ни олий лигага чиқиш учун асосий давогарлардан бири дея эътироф этмоқда.
- Бундан хурсандмиз. Муносиб баҳони айнан ишқибозлар беради.

- Аслида бу йил жамоа олдига қандай вазифа қўйилмоқда?
- Ҳар бир баҳсда мазмунли ўйин намойиш этиб, ғалаба қозонишга харакат қиламиз. Ўтган йили дебют мавсум бўлишига қарамай, йигитларимиз яхши натижа кўрсатганди. Ўйлайманки бу йил ундан-да яхшироқ натижага эришамиз. Тўғриси ҳозир аввало ПФЛ Кубогини ютишни ўйлаяпмиз. Кейин чемпионат ҳақида жиддий бош қотирамиз.

Исломбек Рустамбеков суҳбатлашди.

Фарҳод Сафаров: “ПФЛ Кубогида "ўлим" гуруҳидан жой олганмиз”