Учрашув давомида рақибидан ҳар жабҳада устун келган "қалдирғочлар" ишончли 2:0 ҳисобида ғалаба қозонди ва ўз ҳисобига уч очкони ёздириб қўйди. Баҳсдан сўнг заҳирадан майдонга тушиб "Бунёдкор"нинг ўйинини кучайишига ҳисса қўшган Фарруҳ Икромов фикрлари билан ўртоқлашди.

"Ўтган турда учралган мағлубиятдан сўнг ўзимизга келишимиз қийин бўлди. Муҳими ўша беллашувда йўл қўйган хатоларимизни такрорламасликка ҳаракат қилдик. Мураббийлар штаби машғулотларда ва учрашувга тайёргарлик жараёнида керакли ва зарур кўрсатмаларни беришди. Жамоадошларим билан ўзимизни қўлга олдик ва руҳий жиҳатдан мазкур баҳсга қадар тиклана олдик. Бугун ғалаба қозонишимиз шарт эди. Бошқаси бизни қониқтирмасди.

"Локомотив" ҳам кучли жамоа. Лекин, улардаги вазиятни ҳам тўғри тушуниш керак. Назарий машғулотларда "Локомотив"ни ўрганганимизда стандарт вазиятларда бошқача ҳаракат қилишини кўргандик ва буни кутгандик. Уларда бўйдор футболчилар борлиги сабаб иккинчи қаватда етарлича муаммо туғдиришади. Рақибга имконият қолдирмаслик учун бор кучимиз билан олдинга интилдик",- дейди Фарруҳ Икромов.

Фарруҳ Икромов: "Локомотив"ни мағлубиятга учратишимиз шарт эди"