Ушбу учрашувда жамоанинг тезкор футболчиларидан бири Фаррух Икромов дубль қайд этди ҳамда жамоадошининг битта голига ассистентлик қилди. Якунда футболчи сайтимиз томонидан тур рамзий терма жамоасига киритилди ва 12-турнинг энг яхши футболчиси, деб топилди. Биз эса Фаррух Икромовнинг фикрларини тингладик.

"Сурхон" яхши жамоа. Лекин шу куни омад биз томонда бўлди, деб ўйлайман. Аввалги учрашувлардан фарқли равишда яратилган вазиятлардан унумли фойдаландик. Бизга ғалаба сув ва ҳаводек зарур эди. "Қизилқум" билан баҳсдаги мағлубиятдан сўнг очколаримиз ва турнир жадвалидаги ўрнимизни яхши, деб бўлмасди. "Сурхон"ни мағлубиятга учратиб, бу борадаги кўрсаткичларимизни бироз бўлса-да, яхшилаб олдик.
Суперлигада ҳеч бир жамоа осон ўйин бераётгани йўқ. Рақиблар ҳам биз каби астойдил курашмоқда. Ҳар бир жамоа кучли томонидан фойдаланяпти. Навоийдаги мағлубият бизга ва мураббийимизга жуда қаттиқ таъсир қилганди. Шу боис ғалабага бўлган иштиёқ ва хоҳиш икки карра юқори эди.
Ҳар бир футболчи ўйиндан ўйинга ўсиб боради. Ҳаммага бирдек ёқишнинг иложи йўқ. Лекин майдонда имкониятим борича ўйнамоқдаман. Камчиликларимни тўлдиришга ҳаракат қиламан. Хатоларим устида ишлашдан тўхтамайман", – дейди Фаррух Икромов.

Фаррух Икромов: "Ҳаммага ҳам бирдек ёқишнинг иложи йўқ"