"Биринчи бўлимда ташкил қилган ҳужумларимизга тезлик етишмади. Биз жуда секин ҳаракатландик. Рақиб барча зоналарни ёпишга улгурди. Реализация яхши эмас эди. Зарба берадиган вазиятда пас беряпмиз ва тескариси. Ҳужумда бироз муаммоларга дуч келдик. Ҳайдаров ҳам терма жамоага жўнаб кетган. Муҳаммадали ҳам қизил карточка олди. Буларнинг барчаси бизга панд берди" - дея фикр билдирди Февзи Давлетов бугунги учрашув ҳақида.

- Ҳужумчилар ҳақида гапириб ўтсангиз? Ҳайдаров жамоага қайтиши ёки қишда жамоа янги ҳужумчини сотиб олиши мумкинми?

- Албатта, бу масала бўйича иш олиб борамиз. Қишда кимдирни сотиб оламиз. Учта ҳужумчимиз бўлса яхши бўларди. Иккинчи бўлимда ҳужумчиларга тезлик қўшдик, футболчиларга ҳам қўшимча кўрсатма бердим. Тўп рақиб жарима майдончасига ҳам кўп маротаба етиб борди, аммо реализация яхши даражада эмас эди.

- 2010 йилги ЕЧЛ мавсумида "Барселона" бош мураббийи "Интер"га қарши учрашувда қизиқ бир тактик юриш қилганди, аниқроғи марказий ҳимоячи Жерар Пикени ҳужумчи сифатида ўйнатганди. Бугун сиз ҳам шундай юриш қилдингиз...

- Ҳа, шундай ўйнаб кўриш режамиз бор эди. Бир ҳафта давомида уни ҳужумчи сифатида ўйнатиб келдик. Унинг бўйи баланд ва ҳаводаги тўпларга курашишда устунликка эга, аммо бугун режамиз иш бермади.

Февзи Давлетов: "Ҳужумда муаммоларга дуч келдик"