- Кечаги учрашувдан фарқли равишда равишда бугун “Нефтчи” футзал жамоаси мағлуб бўлди. Бугунги қийин ўтган учрашув ҳақида фикрларингиз...
- Кеча биз 4:0 ҳисобида ғалаба қозонгандик. Шу боисдан Сўғдиёна жамоаси бугунги ўйинга жиддий тайёргарлик кўргани сезилди. Улар учрашув бошиданоқ бизга босим ўтказа бошлашди. Шунингдек рақиблармиз яратилган имкониятлардан фойдаланишди. Шу каби омиллар сабаб бўлди шекилли, шогирдларим биринчи бўлимда ўйин ҳаяжоннини босишда қийинчиликларга дуч келишди. Иккинчи бўлимда ўйинимизни кучайтирдик, барибир юзага келган вазиятлардан фойдаланишда “Сўғдиёна” жамоаси биздан кўра бир оз устунлик қилди. “Сўғдиёна” жамоасини ғалаба билан табриклайман.

- “Нефтчи” футзал жамоасига ёш иқтидорли футболчиларни саралаб олиш тартиби қандай амалга оширилмоқда?
- “Нефтчи” футзал жамоасига мавсум бошида бир қатор ёш иқтидорли футболчиларни саралаб олдик. Ҳозир уларни катта ўйинларга тайёрлаш, тажрибларини орттириш борасида тизимли ишларни йўлга қўйганмиз. Келажакда бу футболчилардан жамоамизга нафи тегадиган маҳоратли футболчилар чиқишига ишончим комил.Биз мунтазам равишда ёшларни кузатиб бормоқдамиз, иқтидорли ёшларни жамоамизга мавсум давомида жалб этишга ҳаракат қиламиз.

- Сиз ўз вақтида Ўзбекистон футзал терма жмаоси сафида ҳам ўйнагансиз. Тажрибали футзалчи сифатида ёшларга қандай тавсиялар берасиз?
- Бугунги замонавий футзал жуда ривожланиб бормоқда. Майдондаги футболчилардан тезкорлик ва ақлини ишлатиб ўйнаш, учрашув учун тайёрланган тактикаларга тўлиқ амал қилиш талаб этилади. Ёшларга ўз устидаларида тинимсиз ишлашлари, тиришқоқлик билан ҳаракат қилишларини, кўпроқ учрашувларни кузатиб хулоса қилишлари лозимлигини айтиб ўтаман.

Бизга ҳар томонлама шароит яратиб бераётганликлари учун “Нефтчи” клуби раҳбариятига, бизни қўллаб-қувватлаётган мухлисларга миннатдорчилик билдираман ва кейинги учрашувларда уларнинг ишончини оқлашга ҳаракат қиламиз.

Бекзод Толибов ёзиб олди.

Футзал. Фарруҳ Зокиров: "Бугунги замонавий футзал жуда ривожланиб бормоқда"