Мазкур баҳсда тошкентликлар ишончли ғалабани қўлга киритди, 5:1. Ўйиндан сўнг “Локомотив” етакчиси Машраб Одилов билан суҳбатлашдик.
“Бугунги ўйин жуда қийин бўлишини билардик, - дея гап бошлади Одилов. Шунга ўзимизни ҳар томонлама тайёрладик. Кучли жамоа устидан ғалаба қозондик. Қолган беллашувларда ҳам шу тариқа ҳаракат қиламиз.

- “Локомотив” айнан ниманинг эвазига ғалаба қозонди, деб ўйлайсиз?
- Биз битта мақсад – ҳимояда ишончли ўйин кўрсатиш ва яратилган вазиятлардан унумли фойдаланишимиз муҳим эди. Ўйиндан олдин барчамиз билардик, рақиб кучли ва улар кўпроқ ҳужум ташкил қилишига интиларди. “Локомотив” бугун кучли ирода намойиш этди. Ўйин давомида яратилган ҳар бир вазиятимиздан тўғри фойдаланган ҳолда ғалаба қозондик.

- “Локомотив”нинг бу мавсумдаги асосий мақсадларига тўхталиб ўтсангиз?
- Фақат чемпионлик учун курашамиз. Таркибимизда жуда кучли футболчилар тўпланган. Олдимизда турган ҳар бир учрашувни ютишимиз ва очколаримиз сонини кўпайтириб боришимиз лозим.

- Рақобатчи жамолар сифатида кимларни кўрсата оласиз?
- Мен алоҳида бирорта жамоани кўрсатмоқчи эмасман. Бу мавсумда чемпионатда кучли жамоалар тўпланишган ва ҳар бир клубнинг ўз олдига қўйган мақсадлари бор. Ўткинчи ўйинлар йўқлигини айта оламан.

- “Нефтчи”га қарши кечадиган ўйин олдидан фикрингиз қандай?
- Биз бу жамоа иштирокидаги иккита учрашувни кузатдик. Жамоада яхши ижрочилар бор. Қолаверса, бош мураббийи ҳам анча тажрибали мутахассис ҳисобланади. “Нефтчи” билан қийин ўйин кечади ва бу баҳсда ғалаба қозониш учун майдонга чиқамиз.

Футзал. Машраб Одилов: “Кучли иродамиз эвазига ғалаба қозондик”