Терма жамоага чақирилган ўйинчилар пойтахтимиздаги "Velara" меҳмонхонасида истиқомат қилишади. Машғулотлар эса "Юнусобод" спорт мажмуасида ўтказилади.

Мазкур йиғин 20–24 сентябр кунлари Бишкек шаҳрида бўлиб ўтадиган Осиё кубоги – 2026 саралаш мусобақаси олдидан сўнгги кўрик вазифасини ўтаб беради.

Йиғин давомида Осиё қитъаси грандларидан бири – Япония терма жамоаси билан назорат учрашувида куч синашиш ҳам режалаштирилган. Кун чиқар мамлакати термасига қарши ўртоқлик ўйини 16 сентябр куни соат 17:00 да "Юнусобод" спорт мажмуасида бўлиб ўтади.

Эслатиб ўтамиз, Ўзбекистон миллий терма жамоаси 18 сентябр куни Бишкекка учиб кетади. Қирғизистон Республикаси пойтахтида бўлиб ўтадиган Осиё кубогининг "F" саралаш гуруҳида терма жамоамиз мезбонлардан ташқари Шарқий Тимор ҳамда Фаластин терма жамоаларига қарши майдонга чиқишади.

Мураббийлар штаби бугун бошланадиган йиғинга қуйидаги футзалчиларни жалб этган:

Дарвозабонлар – Аббос Ўлмасбеков ("BMB PFC"), Шавкат Ибрагимов (“Oil Star”), Дониёр Умаров (“Локомотив”).

Ҳимоячилар – Илҳомжон Ҳамроев (“Oil Star”), Машраб Одилов ("BMB PFC"), Шаҳзод Саъдиев ("BMB PFC").

Қанот ўйинчилари – Беҳруз Самиев (“Oil Star”), Ҳусниддин Нишонов ("BMB PFC"), Элдор Ниғматов (“Локомотив”), Муҳаммадали Хусанбоев ("BMB PFC").

Қанот ҳужумчилари – Элбек Тўлқинов (“Oil Star”), Аброр Ахмедзянов (ОКМК), Музаффар Абдукаримов (ОКМК), Акбар Усмонов (СКБ).

Ҳужумчилар – Музаффар Аҳаджонов ("BMB PFC"), Давлат Ибрагимов ("BMB PFC").

Футзал. Ўзбекистон терма жамоаси йиғинга киришди. Олдинда Япония билан ўйин бор