"Ливерпуль" – "Манчестер Сити"
Стадион: "Энфилд Роад" (Ливерпуль)
Бошланиш вақти: 18:30
Бош ҳакам: Мартин Аткинсон (Англия)

Бугун туманли альбионнинг энг кучли икки жамоаларидан бўлган - "Ливерпуль" ва "Манчестер Сити" ўзаро тўқнаш келади. Томонлар шу кунгача АПЛда бир хил очко жамғаришган ва мағлубиятга учрашмаган. Демак, бугунги баҳснинг қадри икки карра баланд десак хато бўлмас. Агарда учрашувда дуранг қайд этиладиган бўлса, бошқа жамоа турнир жадвалининг биринчи поғонасига чиқиб олиши ҳеч гап эмас.

"Манчестер Сити" кўплаб статистикаларни яхшилаш борасида биринчи жамоалардан. Пеп бошчилигидаги клуб тўпни ушлаб туриш борасида энг яхши натижага эга - 67,3 фоиз. Ҳаммадан кўпроқ зарба берган - бир ўйинга ўртача 24 зарбадан. Барчадан кўпроқ аниқ паслар беришган - 90,4 фоиз. "Шаҳарликлар" аслида барча ўйинларда ғолибга айланган бўлиши керак эди. Аммо жамоа "Вулверхэмптон"га қарши баҳсда дуранг ўйнаб қўйди.

Айни дамда "Сити"да икки йўқотиш бор: Фабиан Делф ва Илкай Гюндоган. Де Брюйне эса машғулотларга қайтган. Бельгиялик бугуноқ майдонга қайтиши ҳам мумкин. Ҳозирда Менди ва Гвардиола ўртасида кичик мунозара юзага келганини ҳисобга олсак, унинг ўйинга тушиши сўроқ остида турибди.

Таркиб борасида "Ливерпуль"нинг ҳолати яхши. Бироқ "қизиллар" мухлислари сўнгги пайтларда натижа борасида норози бўлишмоқда. Клопп жамоаси сўнгги уч ўйинда ғалабага эриша олмади. Ачинарлиси, "Наполи"га қарши "Ливерпуль" ўзининг энг ёмон ўйинини кўрсатди. Аммо бу билан жамоа инқироз кўчасига кириб қолган деб айтиб бўлмайди.

АПЛ ташкил этилганидан буён жамоалар ўзаро 42 учрашувда қатнашишган. Шуларнинг 19тасида "қизиллар", 8тасида эса "шаҳарликлар"нинг устунлиги кузатилган. 15 ўйинда эса ғолиб аниқланмаган. Ўтган мавсумда "Энфилд"да бўлган ўйинда 4:3 ҳисоби қайд этилганди.

Умумий ҳисоблаганда жамоалар ўзаро 182 марта тўқнаш келишган. Шуларнинг 90тасида "Ливерпуль", 45тасида "Сити" ғалаба қозонган. 47 учрашувда дуранг кузатилган. Голлар уриш бўйича ҳисоб - 324:239.

Учрашув Тошкент вақти билан 20:30да старт олади.

Гегенпрессинг тики-такага қарши: "Ливерпуль" "Манчестер Сити" билан ўйнайди ПРЕВЬЮ