Ўйиндан кейинги матбуот анжуманида Япония жамоаси бош мураббийи Го Оива ва учрашувнинг энг яхши ўйинчиси Даики Матсуока иштирок этишди.

-Ўйлашимча Япония жамоаси бугун турнирдаги ўзининг энг яхши ўйинини кўрсатди. Муваффақиятли ўйин идеал режа асосида ишлангани учун рўй бердими?

-Ярим финалда мағлуб бўлганимиздан шок ҳолатига тушиб қолдик. Чунки ушбу турнир чемпиони бўлмоқчи эдик. Ушбу ўйинга тайёргарлик кўраётганда шогирдларимга ўзларини қўлга олиши кераклигини тушунтирдим. Футболчилар гапларимдан яхши ҳулоса чиқарганини кўрдим ва бундан мамнунман. Бу турнирда 3-ўринни қўлга киритдик ва минимум вазифамизни уддаладик.

-Бу ерда 20 кундан бери истиқомат қиляпсиз. Айтингчи бизнинг юртимизда сизга нима ёқди ва нима ёқмади?

-Биринчи ўринда шуни айтишим керак, ўзбек халқи жуда меҳмондўст экан. Мен Ўзбекистон футбол ассоциясига ва барча ташкилотчиларга раҳмат айтиб қоламан. Улар бу турнирда ҳаммаси аъло бўлиши учун жуда кўп тер тўкишди. Албатта сизга (таҳ. сайтимиз муҳбири Учқун Азимов) бизга шундай ажойиб саволлар бериб, биз билан ҳар доим мулоқотда бўлганингиз учун раҳмат айтаман. Умид қиламанки бу ерга яна бошқа турнирларда қатнашиш учун қайтамиз.

-Жамоангиз Ўзбекистон билан ўйнади ва мағлуб бўлди. Мураббий сифатида бу жамоанинг кучи қанчалик эканлигини биласиз. Сизнинг фикрингизча эртага финалда ким ғалаба қозонади?

-Тан оламан ярим финалда бизга жуда қийин бўлди. Ким ғалаба қозонишини билмайман, аммо Ўзбекистонга мухлислик қиламан.

Го Оива: "Эртага Ўзбекистонга мухлислик қиламан"