Учрашувдан сўнг “темирйўлчилар”нинг ягона голига муаллифлик қилган Ғулом Ҳайдар Ғуломов сайтимизга ўйин ҳақида интервю берди.

— Ўйин ҳақида фикрингиз?

— Бугун қизиқарли, жанговор тарзда кечган ўйин бўлди. Икки жамоа ҳам ғалаба учун ўйнади. Бу футбол. Унда кимдир ютади, кимдир эса ютқазади. Ҳар икки жамоа ҳам охиригача курашди, бироқ якунда ғалаба наманганликларга насиб қилди.

— Бугунги учрашувда 3 бор пеналти қўйилди ва буларнинг барчасига VAR аралашди. Учрашувдаги VAR'нинг иштирокини қандай баҳолайсиз?

— Биз қандай пенальти бўлганини VAR орқали кўрмадик. Шу боис ҳам нимадир дея олмайман. Барчаси ҳакамларга кўринди. Лекин ҳар икки жамоанинг футболчиларига ёқмаган жиҳати ҳар битта нарсага VAR'нинг аралашуви бўлди. Ҳакам ўзи назорат қилиши керак бўлган жойда ҳам VAR аралашди. Балки бу Ўзбекистонда биринчи бор ишлатилаётгани учундир, тағин билмадим. Улар ҳали бунга ўрганмагандир, кўникмагандир.

— "Локомотив" 2 та турда ҳам мағлубиятга учради. Бунга нима сабаб? Ўзи жамоада ички муҳит қандай?

— Жамоамизда муҳит ажойиб. Юқорида айтганимдек бу футбол. Кимгадир омад кулиб боқади, кимгадир эса йўқ. Мураббий берган барча топшириқларини бажаряпмиз. Тўхтаб қолиш йўқ, ишлашда давом этамиз.

Оғабек Самисов ёзиб олди.

Ғулом Ҳайдар Ғуломов: “Ҳар бир ҳолатга VAR'нинг аралашуви футболчиларга ёқмади”