- "Биз Бельгияни жуда яхши биламиз. Уларнинг кўп футболчиси Англия премьер-лигасида тўп тепади. Панамага қарши эса ҳали ўйнамаганмиз, шу боис улар билан ўйин қизиқ бўлади. Тунис эса менга 1998 йилги жаҳон чемпионатини ёдга солиб юборяпти. Чунки ўша мундиалда биринчи ўйинни Тунисга қарши ўтказгандик". (Англия терма жамоаси бош мураббийи Гарет Саутгейт ЖЧ-2018 қуръа натижаларидан кейин)

- "Мен терма жамоадан кетяпман. Ҳам "Ювентус", ҳам терма жамоа учун ўзимни худди аскардек ҳис қилганман. Ҳатто 60га кирганимда ҳам Ватан олдидаги бурчимдан воч кечмайман. Чунки бу менга ғоядек сингиб кетган". (Жанлуижи Буффон клуб ва терма жамоага бўлган садоқати ҳақида)

- "Жаҳон" чемпионати ҳақида гап борганда хаёлингизга бирданига Аргентина ва Бразилия келади. Биринчи учрашувни Аргентинага қарши ўтказишимиз мен учун романтик онларни тақдим этаётгандек. Биз бу жамоага қаршилик кўрсатиш учун бор кучни ишга соламиз". (Исландия терма жамоаси бош мураббийи Хеймир Холлгримсон ЖЧ-2018даги биринчи ўйин ҳақида)

- "Ҳаётда эришган натижаларимдан ҳам кўра кўпроқ қувонч улашган нарса бу ота бўлганимдир. Ҳозирча икки нафар фарзандим бор ва тез орада учинчисини кутяпмиз. Биринчи фарзандим туғилганида ўзимни жуда бошқача ҳис қилгандим, иккинчисида ҳам шундай бўлганди ва умид қиламанки, учинчисида ҳам ўша онларни бошдан кечираман". (Лионель Месси "Marca" газетасига берган интервьюсида учинчи фарзанд кутаётгани ҳақида)

- "Ҳозирги замон футболида техника биринчи ўринга чиқиб олди. Ҳар бир мураббий жамоани ўйинга тайёрлаётганда аввало тактика устида бош қотиради. Албатта, жисмоний ҳолатни ҳам унутмаслик керак, чунки бусиз тўпга эга чиқа олмайсан. Ғалаба қозонишнинг яна бир муҳим жиҳати бу - руҳий устун бўлишинг. Чунки ўйинга руҳан тайёр бўлмагунча ютмайсан. Мана шулар билан бирга сенда маҳоратли футболчилар бўлса, муваффақият қозонишинг қийин бўлмайди". (Бразилия терма жамоаси бош мураббийи Тите қандай қилиб ғалабага эришиш ҳақида)

- "У жуда ғалати бола эди. "Арсенал" билан ўйинда қизил карточка олганидан сўнг кийим алмаштириш хонасига кириб телевизорга бутса улоқтиргани ҳамон ёдимда. Лекин у аҳмоқ эмасди, доим одамларга ёрдам берарди. У кимнинг машинасига бензин қуйиш керак бўлса пулини ўзи тўларди, кўчадаги бечора камбағалларга ҳам ёрдам қўлини чўзиб пул берарди. Эсимда, унинг машинасини 27 марта жарима майдончасига қамаб қўйишганди. Чунки у доим машинани рухсат берилмаган жойларда тўхтатарди". (Ўз вақтида "Манчестер Сити"да ишлаган Ле Чапмен италиялик ҳужумчи Мари Балотелли ҳақида)

- "Мен Ибрадан терма жамоанг жаҳон чемпионатига чиқди, сен ҳам борасанми деб сўрадим. У бўлса йўқ деди. Лекин менимча, у бориши керак". (Маркус Рохо клубдаги жамоадоши Златан Ибрагимович билан суҳбатлашгани ҳақида)

- "Ёшлигимда тўпни деразанинг "тўққизлик" бурчагига тепишни яхши кўрардим. Мен шу тариқа жарима тўпларини тепишни ўрганганман. "Милан"да жарима тўпини чиройли амалга ошира оладиганлар кўп эди: Бекхэм, Роналдиньо, Зеедорф... Биз доим билан жарма тўпини қандай тепиш кераклигини муҳокама қилардик ва албатта бир-биримизнинг сирларини ўрганардик". (Андреа Пирло жарима тўплари тепишни қандай қилиб ўргангани ҳақида)

- "Терма жамоамизнинг ҳужум чизиғидан кўнглим тўқ. Игуаин қанчалик кучли эканини барча билади. Эндиликда Мауро Икарди ҳам терма жамоага лойиқлигини исботлаб келмоқда. Қолаверса, Дибала, Месси каби етакчилар бор. Менимча, бу жамоа жаҳон чемпионатида ғолиб чиқа олади". (Аргентина терма жамоаси собиқ сардори Хавьер Занетти ЖЧдан яхши натижаларни кутаётгани ҳақида)

Ҳафта иқтибослари. Машҳур мураббий ва футболчилардан энг сара фикрлар