- "Статистика ҳаммасини айтиб турибди. У футбол тарихидаги энг яхши ўйинчи. Криштиану Роналду машҳурлик бобидан мендан ўзиб кетди, лекин хафа эмасман, чунки ўз вақтида мен ҳам яхши фаолият олиб борганман". ("Реал" бош мураббийи Зинедин Зидан португалиялик юлдуз ҳақида)

- "Биринчи ўйин биз учун финалга тенг бўлади. Бу учрашув жуда қийин ўтади, чунки мен саралаш ўйинларида Эронни кўрдим ва улар яхши таассурот қолдиришди. Агар шу баҳсда ғалаба қозонсак, келажак сари катта қадам ташлаган бўламиз. Гуруҳимизда шунингдек, Португалия билан Испания ҳам бор ва улар буюк жамоалар. Астойдил ҳаракат қилсак, қайсидир жамоадан очко ола оламиз". (Марокаш терма жамоаси собиқ ярим ҳимоячиси Мустафо Хаджи ЖЧ-2018 қуръа натижалари ҳақида)

- "Биз 13 йилни бирга ўтказдик. У доим машғулот пайтида майдонга чиқиб жарима тўплари ва пенальтиларни қандай тепишни бизга кўрсатиб берар, ўйинчилик пайтида стандарт вазиятлар устаси эканини оғзидан бол томиб гапирарди. "Арсенал" билан баҳсда мен хато қилдим, буни тан оламан, ўйиндан кейин хўжайин кийим алмаштириш хонасига кириб ўз-ўзидан ҳаммага бақира кетди. Мен унга жавоб қайтаргандек бўлдим ва шу заҳоти мен томон бутси учди. Мен ўшандаёқ хўжайин ҳазиллашмаётганини тушуниб етгандим". ("МЮ" собиқ футболчиси Дэвид Бекхэм жамоага устозлик қилган Алекс Фергюсон билан ўзаро муносабатлари ҳақида)

- "Биз Аргентинани жиддий қабул қиламиз. Биз Мессига қарши ўйнашни хоҳламаймиз, лекин бу - тақдир. Майдонга чиқиб ўз ўйинимизни ўйнашимиз керак, шунда нима бўлишини вақт кўрсатади. Исландия Европа чемпионатида Англияни мағлуб этгач, бутун дунё кўрди: футболда осон ўйин йўқ. Балки биз ҳам Аргентинага қарши сенсация кўрсатармиз". (Нигериялик Виктор Мозес жаҳон чемпионатида ўз терма жамоасидан нималар кутаётгани ҳақида)

- "Эден ҳали ўз фаолиятининг чўққисига чиққани йўқ. У ўсишда давом этади. Унинг учун энг муҳими ишлаш, ишлаш ва яна ишлаш. Футболчи қачонки "Олтин тўп"ни қўлга киритсагина ўзини чўққига чиққан деб ҳисоблаши мумкин. Ёки Чемпионлар лигасида ёки жаҳон чемпионатида ғолиб бўлишингга тўғри келади. Шундагина ўзингни буюк дея оласан". ("Челси" бош мураббийи Антонио Конте шогири Эден Азар ўз устида ҳали кўп ишлаши кераклиги ҳақида)

- "Тўп билан қандай муомала қилаётганимизни кўриб ҳамма бизга қарсак чалади. Лекин майдон ташқарисида нималар содир бўлишини кўпчилик билмайди. Баъзан ўзингни ёлғиз ҳис қиласан. Албатта, иқтидорни Худо беради, лекин уни ўстириб бориш ўз қўлингда. Мен кичкиналигимда кўплаб яхши футболчиларни кўрганман, улардан Марадона чиқади дердим. Аммо кўплари катта футболда ўйнаб кета олишмади. Ҳаёт мана шундай бешафқат". ("Ювентус" ҳужумчиси Пауло Дибала Италия нашрларидан бирига берган интеврьюсида ёшликда кўрган-кечирганлари ҳақида)

- "Биз 18 июнь куни биринчи ўйинни ўтказамиз, яна кимсан Англияга қарши. Англия бу йил анча кучайди. Деле Алли, Харри Кэйн яхши ўйнаб турса, уларни тўхтатиш осон бўлмайди. Шахсан мен учун Кэйн дунёнинг энг кучли ҳужумчиларидан бири. Бизда ҳам таркиб яхши, орамизда ёшлар кўп. Жамоамнинг ўртача ёши 26ни ташкил этяпти ва бундан хурсандман". (Тунис терма жамоаси бош мураббийи Набил Маълул жаҳон чемпионатида Англияга қарши бўладиган ўйин ҳақида)

- "Мен ўғлим билан "Барса"нинг ўйинини кўргани келганимга хурсандман. Ўғлим эндигина саккиз ёшга тўлди, у Мессининг ашаддий ишқибози. Ўйлайманки, ўғлим учун Мессининг ҳаракатларини стадионда кузатиш катта таассурот қолдирди". ("Барселона" собиқ бош мураббийи Франк Райкаард "Ноу Камп" стадионига ўғлини олиб келгани ҳақида)

Ҳафта иқтибослари. Машҳур мураббий ва футболчилардан энг сара фикрлар