- "Ҳаммаси ҳурматга боғлиқ. Гап бутун дунёдаги тенглик ҳақида боряпти. Биз футбол ўйнаганда ҳаммамиз тенг бўламиз. Биз хитойлик, америкалик, африкалик, франциялик, умуман ҳамма билан футбол ўйнаш мумкин. Майдонда ҳамма тенг, биз фақат шуни одамларга етказишни хоҳлаймиз". ("МЮ" ярим ҳимоячиси Пол Погбанинг УЕФА учун берган интервьюсидан)

- "Бу жуда яхши савол. Мен кўпчиликда катта салоҳиятни кўряпман. Масалан, Марко Асенсио, Килиан Мбаппе, Неймар, Дембеле, Азар, Рэшфорд ва бошқалар. Кейинги авлод орасидан камида ўнта яхши футболчи чиқади деб ўйлайман". (Криштиану Роналдунинг журналистлар томонидан берилган келажакда энг яхши футболчи ким бўлишига доир саволга жавоби)

- "Бизда дунёдаги энг кучли ҳужум чизиғи бор. Мен учун терма жамоага чақирилиш шараф. Месси, Дибала, Ди Мариа, Банега каби юлдузлар билан ўйнар эканман, ўзимни қулай ҳис қиламан. Юлдузларимизда ҳамма нарса етарли, мен улардан кўп нарса ўрганишни хоҳлайман. Мен терма жамоада ҳам ўзимни кўрсатмоқчиман". (Аргентина терма жамоасига таклиф этилган Мауро Икардининг айтганлари)

- "Гарет Саутгейт мени терма жамоага чақирганидан хурсандман. У навбатдаги учрашувларда мени ҳам майдонга туширмоқчи. Бу менга жуда ёқди. Лекин ҳамма нарсанинг якуни бор. Мен мураббийга терма жамоадан кетиш ниятим борлигини ётиғи билан тушунтирдим. Бу қарорни қабул қилиш мен учун жуда оғир бўлди, оилам, яқинларим ва "Эвертон" мураббийлари билан бу ҳақда гаплашдим. Англия учун ўйнаш мен учун ҳар доим шараф бўлган. Лекин энди кетадиган вақт келди, аммо бир умр терма жамоанинг катта мухлиси бўлиб қоламан". (Англия термаси тўпурари Уэйн Руни терма жамоадан кетишга қарор қилгани хусусида)

- "Афсона бўлиш яна нима қилиш керак? Мен буни билмайман. Мен уни фантастик даражадаги халқаро фаолият билан табриклайман. Руни Англия учун кўп ишларни бажарди. Уни қаттиқ ҳурмат қиламан. Агар у қайтаман деса, эшик доим очиқ". (Англия термаси бош мураббийи Гарет Саутгейт терма жамоадан кетган Рунининг қарори ҳақида)

- "Биз ҳар доим бир гапни такрорлаб келганмиз, яъни эшик ҳеч кимга қаттиқ ёпилмайди. У ҳозир бизга ёрдам бера олади. У клуби билан яхши натижаларга эришмоқда ва ўзи ҳам зўр ўйнаяпти. У доим ҳаракатчан. Тўғри, у тўп сураётган чемпионатга Европада эътибор беришмас, лекин мен футболчини эшитиб кўрдим ва унга терма жамоа эшиклари очиқлигини айтдим". (Испания терма жамоаси бош мураббийи АҚШда фаолиятини давом эттираётган Давид Вилья ҳақида)

- "Мен у билан ўтган мавсум "Фенербаҳче"да бирга ишладим ва унинг нималарга қодирлигини биламан. Агар Робин кучли ва бизга керакли бўлса, нима учун уни терма жамоага таклиф этмаслигимиз керак?" (Голландия термаси бош мураббийи Дик Адвокат бош жамоага чақирилган ҳужумчи Робин ван Перси ҳақида)

- "Мен дарҳол пивонинг нохуш таъмидан қутулишим керак. Германиядан то Ливерпулгача машинада 25 соат йўл босишимга тўғри келди ва у ерга боргач маза қилиб пиво ичай дедим. Кейин стадионга йўл олдим. Аммо у ердан оғзимда нохуш таъм билан чиқдим. Бу таъм ҳалиям кетгани йўқ". ("Хоффенхайм" мухлисининг "Regenbogen" радиосига айтган гаплари)

- "Мен бошлаган ишимни тугатиб қўйиш учун қайтдим. Ибра-кадабрани ўз таркибида кўришни хоҳловчи клублар кўп эди, аммо мен "МЮ"ни танладим ва бу клуб таркибида ажойиб бир йилни ўтказдим. Мавсум чиройли ўтди, учта соврин ютдик, ҳамма хурсанд бўлди". ("МЮ" ҳужумчиси Златан Ибрагимович клуб билан янги шартнома тузганидан сўнг)

- "Камида битта инглиз клубини ярим финалда кўришни ҳохлайман. Анчадан бери инглиз жамоалари финалга чиқмай қўйди. Ўйинлар кўп? Мавсум оғир? Боксинг дэй? Бу гаплар умуман баҳона бўлиши керак эмас. Биз футболга яхши пул тикяпмиз, дунёнинг турли бурчакларидан энг кучли футболчилар келяпти. Лекин мусобақада ютқазар экансан, ўзингдан кучли клуб сени ютганини тан олиш керак. Футболнинг қонуни шу, бошқа баҳона йўқ. Афсуски, ҳозирги пайтда "Реал", "Барселона" ва "Бавария" Англия клубларидан анча ўзиб кетди". ("Челси" собиқ футболчиси Фрэнк Лэмпард инглиз клубларининг ҳам ЕЧЛда ғолиб чиқиш пайти келгани ҳақида)

Х.Холиқов тайёрлади.

Ҳафта иқтибослари. Роналду, Руни, Дик Адвокат ва бошқалардан энг сара фикрлар