"Верона" - "Интер"

Бу ўйинда Лазаньянинг иштироки сўроқ остида қолмоқда, шу билан бирга Зеефекда ҳам шундай вазият. Хрустич жароҳат туфайли, Фараони эса дисквалификация сабаб ўйнамаслиги аниқ. Ҳужумда катта эҳтимол Журичга ишонч билдирилади. Унга орқароқдан Верди ва Лазович ёрдамлашади.

Афсуски, гол урган Госенс жароҳат олиб, сафдан чиқди. Чапда Димаркога алтернатив вариант қолмади. Ўнг қанотда эса Думфрис ҳаракат қилади. Ҳужумда эса Жеко ва Лаутаро жуфтлигини кўрамиз.

"Интер" биринчи даврада "Верона"ни 1-0 ҳисобида қийинчилик билан мағлуб этган. Ҳозир ҳам "нерадзурри" фаворит сифатида кўрилмоқда, аммо "Верона"га қарши ўйинда эътиборни йўқотмаслик муҳим.

"Милан" - "Кремонезе"

Томори бу учрашувни дисквалификация туфайли ўтказиб юборишга мажбур. Унинг ўрнини Тиау эгаллайди, Побега ва Флоренци эса ҳали ҳам жароҳати билан оввора. ЕЧЛ ярим финали олдидан Пиоли баъзи етакчиларга дам бериши мумкин. Шундай экан Де Каттеларе, Ребич ва Оригига имкон берилади.

Меҳмонлар сафида Бенасси жароҳатланган, Тсаждут ва Кульята беллашувни дисквалификация сабабли ўтказиб юборади. Ҳужумда Балардини Дессерс ва Чиофани жуфтлигига ишонч билдирса керак.

Жамоаларнинг биринчи даврадаги тўқнашуви ўта зерикарли бўлганди ва мухлислар гол кўрмаган. Бу сафар вазият бошқачароқ бўлади деб ўйлаймиз. "Милан" "Рома" билан ўйинда очко йўқотгач, бошқа очко йўқотиши мумкин эмас. Шунинг учун "Кремонезе" ҳимоясига илк дақиқалардан босим уюштирилади.

"Монца" - "Рома"

Петаньянинг сафга қайтиши жуда яхши янгилик. У асосий таркибда тушса ҳам ажаб эмас. Бироқ Д`Алессандро ўйинни ўтказиб юборади шекилли. Қолган чизиқларда "Монца"да муаммо йўқ. Тактик схема эса жиддий ўзгармаса керак.

Жозе Моуриньо эса жиддий муаммоларга дуч келган. Смоллинг, Льоренте ва Кумбула жароҳатланган. Ҳимоя марказида ким тушиши катта савол. Шунингдек, Вейналдум, Матич, Карсдорп ва Белотти ҳам ўйнай олмайди, Дибала ҳам жамоага ёрдам бериш эҳтимоли жуда паст.

Жамоаларнинг аввалги тўқнашувида "Рома" "Монца"ни мағлуб этган. Бироқ "жаллоросси"нинг ҳозирги муаммоларини инобатга олсак, бу сафар уч очкони қўлга киритиш анчайин мушкул вазифа. "Рома"нинг бор умиди хавфли стандартлардан бўлса, "Монца" рақиб ҳимоясидаги йўқотишлардан унумли фойдаланишга уриниб кўради.

"Удинезе" - "Наполи"

Деулофеу ва Эбоссе ҳамон лазаретда, ҳужумда эса Несторовскига Перейра ёрдам беради. Бийол кичик жароҳатидан қутилиб, сафга қайтгани Соттилни хурсанд қилиши аниқ.

"Наполи" титулни ўз мухлислари кўз ўнгида расман қўлга кирита олмаганидан жуда хафалиги аниқ. Политанонинг майдонга тушиши сўроқ остида бўлса, Руй ўйнолмаслиги аниқ. Аввалги учрашувдаги гол муаллифи Оливейра эса бундай ҳолатда асосий таркибда бўлиши деярли аниқ.

Биринчи даврада "Наполи" қийин, аммо муҳим (3-2) ғалабани қўлга киритганди. Табиийки, чемпионат етакчиси фаворит. Агарда "Лацио" ўз ўйинини ютса, "Наполи" ҳам чемпион бўлиш учун ғалаба қозониши шарт бўлади. Бундай вазиятда неаполликлар ҳужумини тўхтатиб қолиш "Удинезе" ҳимояси учун осон бўлмаслиги аниқ.

Сергей Румянцев

Нозима Тўхтамирзаева таржимаси

Ҳафта ўртасидаги тур: А Серия 33-тур превьюси