"Биз қийин ўйин бўлишини кутган эдик. "Пахтакор" мураббий алмашганидан сўнг бошқача футбол ўйнамоқда. Сўнгги уч турда жамоа 15та гол урди ва бор-йўғи 3та гол ўтказиб юборди. Жамоам намойиш этган ўйиндан уялмайман. Биз рақиб ҳужумларига ўз ҳужумларимиз билан жавоб бера олдик. Яратган вазиятларимиздан фойдалана олмадик. Яна бир бор сўнгги сонияларда гол ўтказиб юборган ҳолда мағлуб бўляпмиз" - дейди Ҳаким Фузайлов бугунги баҳс ҳақида.

- "Пахтакор" биринчи бўлимда кўплаб ҳужумлар уюштирди ва "Хоразм"ни ҳимояланишга мажбур қила олди. Танаффусдан кейин эса "Хоразм" кўплаб вазиятлар яратди ва менинг назаримда устунлик қилди. Танаффусда футболчиларга нималар дедингиз? Жамоангиз икки хил тайм ўтказганининг сабаби нимада?

- Биз "Пахтакор" ҳозир яхши формада эканлигини билар эдик. Иккинчи бўлимда кўпроқ тўпга эгалик қилишимиз кераклиги ҳақида айтдим. Шундан сўнг вазиятларга эга бўла бошладик. Афсуски, имкониятларимиздан фойдалана олмаймиз. Бу бизнинг касалимиз. Агар яна гол ура олганимизда "Пахтакор" ғалаба қозониши янада қийинлашган бўлар эди.

- Ўйин бошланишидан аввал Шаҳром Самиев асосий таркибдан тушиб қолди. У ўйиндан олдин жароҳат олдими?

- Ҳа. Чигил ёзди машғулотларида жароҳат олди. Энди эртага шифокор кўригидан ўтиши керак бўлади.

- Олдинда ФИФА кунлари бор. Ушбу танаффусдан қандай фойдаланмоқчисиз?

- Бизда катта танаффус бўлмайди, сабаби биз "Қизилқум"га қарши қолдирилган ўйинни ўтказамиз. Чемпионатда энди 10та ўтказилди, олдинда ҳали 20та учрашув бор.

Ҳаким Фузайлов: "Жамоам намойиш этган ўйиндан уялмайман"