- Ўйин ҳақида фикрингиз?

- Чемпионатнинг яна бир турини ўтказдик. Одатдагидек баҳсни яхши бошладик, тўп билан кўпроқ муомала қилдик. Аммо биринчи таймдаги учала голни ҳам ўзимизга ўзимиз олиб келдик. Рақиб ортиқча қийинчиликсиз голлар урди. Бу нима билан боғлиқ? Биринчидан мавсум якуни, иккинчидан эса сафимизда жароҳат олганлар кўп. Афсуски, захира ўриндиғимиз узун эмас. Иккинчи тайм футбол ўйнай олишимизни ва гол ура олишимизни кўрсатдик. Раҳбариятга жамоани Суперлигада олиб қоламиз деб ваъда берганмиз. Шундай экан, охиригача курашамиз. Буёғига охирги тур ва плей-оффга муносиб тайёргарлик кўрамиз.

- Дарвозабон Сардор Қобулжоновнинг биринчи таймдан кейин алмаштирилиши учта гол ўтказгани билан боғлиқми?

- Йўқ, гап бунда эмас. Сардор анчадан бери ўйнамаётганди, шу боис имкон бердик. Ваҳоланки, у тажрибали дарвозабон ва буни ҳамма билади. Шунчаки биз биринчи таймдаги учта гол сабаб дарвозабонни алмаштиришга қарор қилдик ва унинг ўрнига Машҳур Муҳаммаджонов ўйинни давом эттирди. Менимча, ҳар қандай дарвозабон учун учта гол ўтказиш оғир зарба ҳисобланади. Биз вазиятни ўзгартиришга ҳаракат қилдик, холос.

- Владимир Бубанья бугун захирада қолди.

- Фақат Бубанья эмас, Аббос Отахонов ҳам дисквалификация сабаб бугунги ўйинни ўтказиб юборди. Бубаньяга келсак, у ўйиндан олдин ўзини бироз ёмон ҳис қила бошлади. Унинг жароҳати оғриб қолди. Шу боис таваккал қилмадик. Айтиб ўтганимдек, буёғига ҳаракатимиз жамоани плей-оффга тайёрлашга қаратилади. Мавсум охири, кўпчиликда чарчоқ бор. Лекин охиригача курашамиз.

Ҳаким Фузайлов: "Учала голни ҳам ўзимизга ўзимиз олиб келдик"