- Ютишимиз керак бўлган ўйинда дуранг ўйнадик. Иккинчи таймда жамоамиз яхши ўйнади. Футболчиларга эътирозим йўқ. Яратилган вазиятлардан фойдалана олмадик. Тўртинчи маротаба кетма-кет дуранг қайд этдик. Ҳужумларни голга айлантиришда оқсаяпмиз, - дея ўйин ҳақидаги фикрлари билан ўртоқлашди Ҳамиджон Актамов.

- Ҳужумчи Воҳид Шодиевни умуман таниб бўлмай қолган. Шодиев легионер бўлиб ўйнаб келганидан буён буткул ўзгарган. Унинг ўрнини эгаллаши мумкин бўлган ҳужумчилар йўқми ёшлар жамоасида? Тўғрисини айтганда, "Қизилқум" Шодиев билан бир футболчи кам ўйнаётгандек таассурот қолдирмоқда...

- Бекзод Ғанижонов бор ёш ҳужумчилардан. Лекин бу футболчини жароҳати борлиги учун ундан фойдалана олмаяпмиз. Ҳозирча ҳужумчилар борасида оқсаётганимиз бор гап. Захирада ҳам уларни ўрнини тўлдирадиган футболчилар йўқ.

- Бугун захирадан фақатгина биргина футболчини майдонга туширдингиз...

- Иккинчи бўлимда Отабек Зокировни майдонга туширгач ўйинимизда, хусусан қанотларимиз янада фаоллашди ва биринчи таймга нисбатан кучлироқ ўйнадик. Лекин ҳужумларга якуний нуқтани қўйишда адашдик. "Обод" ҳам яхши жамоа. Бугун улар жуда тартибли ҳимояланишди. Қойил. Нега захира имкониятидан тўлиқ фойдаланмаганимга келадиган бўлсак, майдондаги футболчиларнинг ўйини, ҳолати мени қаноатлантираётганди. Шу боисдан ҳам бошқа ўзгаришларни амалга оширмадим.

- Алишер Юсупов кўринмай қолди...?

- Алишер Юсупов жиддий жароҳат олган. Унинг қачон сафга қайтиши ҳали номаълум.

- Жамоа олдига аниқ вазифа қўйилганми?

- Биз юқори ўринлар учун ҳаракат қиламиз, интиламиз. Лекин жамоамиз олдига аниқ вазифа қўйилмаган. Мақсадимиз иложи борича юқори ўринлардан бирини эгаллаш.

Эслатиб ўтамиз, "Қизилқум" жамоаси Олий лиганинг охирги тўртта учрашувидан буён дуранг ўйнамоқда. Дастлаб Навоийда "Сўғдиёна", "Олмалиқ", "Насаф" ва "Обод"га қарши ўйинларда дуранг қайд этилди.

"Қизилқум" жамоаси 9-турдан кейин 10 очко жамғарган ҳолда турнир жадвалининг 12-поғонасида бормоқда.

Ҳамиджон Актамов: "Қизилқум"нинг олдига аниқ вазифа қўйилмаган"