Тенг курашлар остида кечган ўйинда муборакликлар кичик ҳисобда мағлубиятга учрашди (0:1). "Газчилар" ушбу учрашувда енгилган бўлишса-да, ўйин давомида бир нечта голли вазиятлар яратишди. Биз эса мазкур баҳсдан сўнг "Машъал" сафида фаол ҳаракатлари билан ажралиб турган Ҳумоюн Муртозаевнинг фикрлари билан қизиқдик.

- "Машъал" мавсумни "Бунёдкор"га қарши баҳс билан бошлади. Нима деб ўйлайсиз, чемпионат старти арафасида мураббий ўзгариши ўз таъсирини ўтказдими?

- Мавсумдаги биринчи учрашувимиз омадсиз ўтди. Кейинги ўйинларда йўқотилган очкони ўрнини тўлдиришга ҳаракат қиламиз. Мураббий ўзгаришига келсак, биз проффессионал футболчилармиз, ҳамма нарсага тайёр туришимиз керак.

- Одатда "Бунёдкор"га қарши сафарда ўйнайдиган жамоалар кўпроқ ҳимояга эътибор қаратишади. "Машъал" эса голдан кейингина олдинга ўтишга интилди...

- Айтиб ўтганимдек, мавсумдаги биринчи ўйин бўлгани сабабли ўз ўйинимизни юз фоиз кўрсата олмадик. Навбатдаги учрашувларда ҳужумкор ўйин кўрсатамиз. Чунки ғалаба зарур. "Бунёдкор" ўз уйида тўп билан жуда яхши ҳаракат қилади.

- Икки жамоанинг ўз даражасида тўп тепа олмагани алдамчи ҳолатми ёки кўп нарса тайёргарликка боғлиқми?

- Менимча ҳам шундай, дастлабки турлардаги натижалар алдамчи бўлиши мумкин. Ўйиндан ўйинга кучайиб борамиз. Мавсумга яхши тайёргарлик кўрдик.

- Қишда сизга Осиё клубларидан таклифлар бўлгани ҳақида эшитдик...

- Қишда ҳам, айни пайтда ҳам таклифлар бор. Агар клубга фойдам тегадиган бўлса, кетаман.

- Агарда сир бўлмаса, қайси чемпионатлардан чорловлар келиб тушди?

- Сир бўла қолсин.

- Жамоа иккинчи турни Тошкентда "Пахтакор"га қарши ўтказади. Қуръа "Машъал"га қийин келдими?

- "Пахтакор" кучли жамоа. Лекин биз ҳеч кимдан қўрқмаймиз. Рақиб ким эканлиги муҳим эмас. Майдонга фақат ғалаба қозониш мақсадида чиқамиз.

Абдулазиз Искандаров

Ҳумоюн Муртозаев: "Машъал"га фойдам тегса, легионерга айланишга тайёрман"