Уларниг орасида белоруссиялик Игор Криушенкони алоҳида ажратиб кўрсатса арзийди. Уни 2012 йили “Шўртан”га таклиф қилишди. Аммо мутахассис Ғузорда фақат ярим мавсумгина фаолият олиб борди холос. Аммо шу вақт давомида у ўзидан ижобий таассурот қолдирганди.

Айниқса, футболчилар билан қандай тил топишишни яхши биларди. Унинг жамоаси европача футбол намойиш этишни бошлаганди. Ўша пайтда унинг қўли остида тўп сурган ҳар бир ўйинчи Криушенко ҳақида яхши гапларни айтиб юришади. Белоруссиялик мураббий айни пайтда ўз юртида “Торпедо БелАЗ” клубини бошқариб келмоқда. Унинг жамоаси кучли олтиликдан жой олиб “А” гуруҳ аъзосига айланди. Криушенко фаолияти мобайнида “БАТЭ”, Минскнинг “Динамо” каби жамоаларни ҳам бошқарган. Шунингдек, Россиянинг “Сибирь” клубида ҳам муваффақиятли иш олиб борган. Клубни премъер-лигасига олиб чиқди. Кейин Россия Кубоги финалигача етиб келишди ва бу орқали УЕФА Кубоги саралашида иштирок этишди. 2012 йилнинг иккинчи ярмидан бери Жодинонинг “Торпедо БелАЗ” клубига бош мураббийлик қилиб келмоқда. У билан боғланиб айрим саволларимизга жавоб олишга муваффақ бўлдик.

- Cалом, Игор Николаевич! Биз Ўзбекистондан “Футбол Экспресс” газетасиданмиз...
- Наҳотки, Ўзбекистондан! Очиғи, хурсанд бўлдим. Мени эслаганингиз учун раҳмат.

- Сизнинг “Торпедо БелАЗ” жамоасига устозлик қилаётганингиздан хабардормиз. Ҳозирги пайтда у ердаги ишларингиз қандан кечмоқда?
- Ҳа тўғри, чиндан ҳам “Торпедо БелАЗ” клубида ишлаяпман. Биласизми, айни пайтда биздаги клублар кучли ҳамда кучсиз тоифаларига ажратилган ҳолда икки гуруҳга бўлинган. Мен бошқараётган жамоа эса кучли олтиликка киришга муваффақ бўлди. Лекин ҳали қиладиган ишларимиз кўп. Сабаби, олдинда яна икки даврадан иборат ўйинлар кутиб турибди.

- Тушунарли. Раҳбарият томонидан олдингизга қандай вазифа қўйилган?
- Мухлисларга ёқадиган ўйин кўрсатиш жамоамизнинг фалсафаси ҳисобланади. Мақсадимиз жиддий – медаллар учун курашиш. Бу йўлда ишқибозларга ёқадиган ўйин кўрсатган ҳолда мақсадимизга эришмоқчимиз.

- Бу борада сизга омад тилаймиз!
- Раҳмат!

- Игор Николаевич, Ўзбекистондан кетганингиздан кейин фаолиятингизни юртингизда давом эттириб келяпсиз. Биз учун қизиқ бўлган томони шундаки, Ўзбекистон ва Белоруссия футболи ва унинг чемпионатлари ўртасидаги тафовутни қанчалик сездингиз?
- (Бироз ўйланиб) Назаримда сизнинг чемпионатингизга қараганда, Белоруссия чемпионатининг савияси баландроқ деб ўйлайман. Яхшилаб ўйлаб қарасам, устунлик томонларини сезяпман. Айни чоғда “БАТЭ” билан “Динамо” чемпионатда пешқадамлик қилиб келишяпти. Шуни алоҳида айтсам бўлади-ки, иккала жамоа ўйин сифати ва бошқа томонлама рақибларини анча ортда қолдиришмоқда. Улар чинакам етакчиларга хос хусусият билан ўйин кўрсатишяпти. Қолган жамоаларимизни эса Ўзбкистоннинг етакчи клубларига тенглаштирган бўлардим.

- Энди Ўзбекистондаги фаолиятингизга тўхталмоқчимиз. Афсуски, “Шўртан”да ярим мавсум ишладингиз холос. Шунга қарамасдан у ердаги ҳаётингизни қандай хотирлайсиз?
- Ҳаммаси яхши бошланганди. “Шўртан” ёмон жамоа эмасди. Мураббий сифатида ўзимдан илиқ таассурот қолдиришни истагандим. Шу мақсадда у ерда яхши жамоани тузгандик. Мен учун футболчилар билан ишлаш ҳамда уларнинг кўнглига йўл топиш осон эди. Бу борада муаммоларга дуч келмаганман. Лекин ёқимсиз томони шундаки, “Шўртан” менинг ва футболчиларнинг олдидаги молиявий мажбуриятларини ижобий тарзда ечимини топмади. Бунинг оқибатида Ғузордан кетишга мажбур бўлдим. Умуман олганда эса у ерда ишлаш менга ёқарди.

- Сиздан кейин клуб инқирозга юз тутди. Натижада биринчи лигага тушиб кетди. Бундан хабарингиз борми?
- Ҳа, собиқ жамоамни бироз бўлса-да, кузатиб бордим. Барибир ишлаган клубим учун бефарқ қараб тура олмасдим. Ачинарлиси, “Шўртан” биринчи лигада қатнашмоқда. Дарвоқе, эшитишимча Мухтор Қурбонов бош мураббий эканми?

- Ҳа. Сизга айнан шу ҳақида савол бермоқчи бўлиб тургандим. У мавсум бошида бош мураббийликка тайинланди.
- Мен уни яхши биламан. “Шўртан”да ишлаган пайтимда менга ёрдам берганди. Мухтор футболни яхши тушунади ва унинг муҳитини ҳис қилиб ишлайди. Унинг бошчилигида яна олий лигага қайтса бундан фақат хурсанд бўламан. Шунинг учун “Шўртан”га ва Қурбоновга омад тилаб қоламан.

- Игор Николаевич, сиз учун яна Ўзбекистонда ишлаш имконияти пайдо бўлса, бунга қандай жавоб берардингиз?
- Яна юртингизда ишлашим мумкин. Агарда ўз олдига жиддий вазифаларни қўя оладиган клуб бўлса ўйлаб кўрардим. Чунки мен аниқ мақсад учун курашадиган клубда ишлашни яхши кўраман.

- Ўтган вақт давомида чемпионатимиздан таклиф бўлдими?
- “Торпедо БеЛАЗ” менга ишонч билдиргач бутун эътиборимни ушбу клубга қаратганман. Ўзбекистондан менга таклиф бўлса, ўша клуб юқори ўринлар учун курашадиган бўлиши лозим, шундагина мен тайёрман деб жавоб бераман. Қисқаси, амбицион жамоалардан тушадиган таклиф мен учун доимо қизиқарлидир.

- Жамоангизда тўп сураётган футболчилардан бири – украиналик Сергей Доценко биринчи даврада “Андижон” шарафини ҳимоя қилди. У “Торпедо БелАЗ”га қандай бориб қолди?
- Футболда жароҳатлардан қутулиб бўлмайди. Шу нуқтаи назардан қараганда, бизнинг икки футболчимиз турли жароҳатларга дучор бўлиб сафдан чиқишди. Тезда уларнинг ўрнини боса оладиган ўйинчи керак бўлиб қолди. Натижада агентлар ёрдамида Сергей билан боғланиб уни жамоамизга таклиф қилдик. Кейин билсам, биринчи даврада “Андижон”да ўйнаган экан. Табиийки, Доценконинг ҳатти-ҳаракатларини обдон кузатганимиздан сўнг шартнома туздик ва бу билан тўғри қарор қабул қилдик деб ўйлайман.

- Демак, Ўзбекистон чемпионатини кузатишда давом этяпсиз. Бундан чиқди, футболимизга оид яна қанақа маълумотларни айта оласиз?
- Сизларда чемпионлик учун кураш роса қизияпти. Бунгача “Локомотив” биринчи ўринда бораётганди. “Пахтакор”да эса битта заҳира ўйини бор эди. Билишимча, улар ўша қолдирилган ўйинда ютиб пешқадамга айланиб олибди. Кейинги ўринларни “Бунёдкор” билан “Насаф” эгаллаб турганидан ҳам хабарим бор. Биласизми, қайси мамлакатда ишласам, кейинчалик албатта ўша ернинг футболи билан қизиқиб бораман.

- Нима бўлганда ҳам фаолиятингизга омад тилаймиз. Ишингиз тиғиз бўлишига қарамай, бизга вақт ажратганингиз учун миннатдормиз. Сўнгги сўз ўрнида нима айта оласиз?
- Сиз билан гаплашганимдан хурсандман. Барча ўзбекистонликларга алангали саломимни етказинг. Мухлисларга соғлиқ ва омад тилайман. Мен уларнинг стадионда футболчиларни қандай қилиб қўллаб-қувватлаганликларини кўрганман. Ишқибозлар ҳар доим ўз жамоасини бирдек олқишлаб туришини истайман. Юртингизда футболнинг ривожланиб бораётганини кўриб қувонганман.

ФИРДАВСХОН суҳбатлашди.

Игор Круишенко: “Ўзбекистонда ишлаш менга ёқарди”