- Ўзбекистон илк маротаба мундиалга йўл олмоқда. Босиб ўтилган йўл ҳақида гапириб ўтсангиз. Ушбу саралаш босқичида терма жамоа учун қандай ўтди?

- Цикл анча қийин бўлди. Режаларимиз иш бермаган вазиятлар ҳам бўлди. Энг муҳими, Жаҳон чемпионатига чиқдик. Бугун, оғир жароҳатдан сўнг илк маротаба майдонга қайтдим ва гол урдим. Бундан жуда хурсандман. Ажойиб ҳиссиётлар.

- Футболчилик фаолиятингизда тўртинчи ЖЧ саралаш циклида иштирок этгансиз. Илк саралаш учрашувингиз 2013 йил Иорданияга қарши бўлган. Тўртта турли хил цикллар ҳақида фикр билдириб ўтсангиз. Ушбу 12 йил вақт ичида нималар ўзгарди?

- Менинг фикримча, футбол билан жиддий шуғуллана бошладик. Раҳбарият футболга катта эътибор қаратмоқда. Шу сабабли, ёш "супер" ўйинчилар етишиб чиқмоқда. Ҳусанов, Аббос ва Элдор каби футболчилар планкани анча юқорига кўтаришди. Футболга ҳақиқатдан ҳам эътибор берила бошланди. Академиялар ва инфратузилма яхшиланди. Энди буларнинг барчаси ўз натижасини кўрсатмоқда.

- Президент билан кўришиб, мукофот олдингиз. Мамлакат юртбоши сизга нималар деди?

- Президентимиз менга раҳмат айтди. Мендан фахрланишини оила аъзоларимга айтишим кераклигини таъкидлади. Мен учун президент билан учрашиш катта шараф эканлигини айтдим. Суҳбатни сўзлар билан тасвирлаб бера олмайман. Очиғини айтсам, йиғлаб юборишимга бир бахя қолди.

Игорь Сергеев: "Йиғлаб юборишимга бир бахя қолди"