Ўйин ҳақида

- Мағлубиятга ҳамиша мураббий айбдор бўлади. Бугун мен ютқаздим. Қолган жиҳатларни жамоа ичкарисида ҳал қиламиз. Бугунги мағлубият учун ҳеч кимни айбламаган бўлардим. Барча айбни ўз зиммамга оламан.

- Улуғбек Худойбердиевга кўрсатилган қизил карточкага муносабатингиз?
- Бунга ҳакамлар қўмитаси баҳо беради. Мен ҳозир бу ҳақида айтишим нотўғри. Айтишим мумкин, ҳар бир жамоага футбол ўйнаш учун имконият яратиб берилиши керак. Бугунги ўйинда йигитлар борини бериб ўйнашди, лекин ҳакамлар ҳар икки жамоага охиригача ўйнаш имконини беришмади.

- Жамоа ўтган ўйинда ҳам, бугун ҳам 80-дақиқадан кейин гол ўтказиб юборди. Бу жисмоний тайёргарлик билан боғлиқми?
- Мен бундай деб айтмаган бўлардим. Самарқандда ҳам, бугун ҳам ҳушёрликни йўқотиб қўйганимиз эвазига голлар ўтказдик. Ўша ўйинда самарқандликлар омад эвазига ютиб кетишди. Бугун қизил карточкадан сўнг ўйинимизни йўқотдик. Шахсий фикримча, бу вазиятда қизил карточка йўқ эди. Албатта бу менинг қарашим, вазиятни таҳлил қиладиган ҳакамлар қўмитаси бор.

"Янгиер" жамоаси таркибига жалб этилган барча футболчиларга ишонишда давом этамиз. Улар мавсум давомида янада кучайиб боришади.

"Нефтчи" курашувчан жамоа, бугун улар агрессив ўйин кўрсатишди. Голларни хатолар ва ҳушёрликни йўқотиб қўйганимиз эвазига ўтказиб юбордик.

ПРО-Лигада рақобатчи жамоалар кўп, деярли барча жамоалар бир хил даражада. Максимал натижа қилиш жуда ҳам қийин. Ушбу чемпионатнинг савияси йилдан-йилга ортиб бормоқда.

Илдар Сакаев: "Мағлубият учун барча айбни ўз зиммамга оламан"