Ўзбекистон терма жамоаси 1994 йили Осиё ўйинларида ғалаба қозонганига роппа-роса 20 йил бўлди. Мазкур натижани такрорлаш учун жуда ҳам яхши имкониятга эгалигимиз боис, мусобақага ташриф буюрган эдим. Инчеон жуда катта шаҳар, кўплаб спорт ўйинлари Инчеондан ташқарида бўляпти. Масалан, Ўзбекистон терма жамоаси "Гоянг" стадионида машғулот ўтказади. Бу биз ишлайдиган ҳудуддан чамаси бир ярим соатлик йўл дегани. Машғулотга кеч қолмаслик учун тонгда бошланаётган спорт ўйинларига бора олмайсиз, машғулот якунига етганидан сўнг Тошкентга видео материалларни юбориш керак. Қолаверса, компьютер олдида ўтириб кундалик ва ахборотлардан ёзиш керак. Қарабсизки, сизда биронта спорт ўйинига боришга вақт бўлмайди. Кунига автобусда тахминан 4 соатга яқин вақтни ўтказяпмиз. Бу ҳар куни Тошкендан Самарқандга бориш деганидир.

Фикрларни қолдирмай ўқиганлигим боис, кеча кундалик ўрнига бошқа спорт турларини ёритиш буйруғини олдим. Шу жойига бир нарсани айтиб кетай, бу ФУТБОЛ сайти! Қолган барча спорт хабарларини olamsport.com сайтида ёритяпмиз. Балки буни Сиз билмайсиз, аммо ноўрин танқидга мен ҳарҳолда жавоб бераман. Ўринли танқид устида эса ишлайман. Агар сизга спорт ёқса, марҳамат olamsport.com сайтига киринг. Яна бир нарсани таъкидлаб ўтишни истардим, кундалик бу биринчи шахс томонидан кун давомида қилинган ишлар баён қилинадиган лойиҳа. У ерда муаллиф ўқувчига ҳисобот беради.

Ундан ташқари Осиё ўйинларида қатнашаётган ҳар бир федерациянинг матбуот котиблари, яъни раҳбарларнинг қариндош-уруғлари бор. Афсуски, мана шундай мусобақалар давомида, уларнинг мутахассис эмас, шунчаки амакисининг ўғли ёки гапдаги дўстининг укаси эканлиги билиниб қолади. Улар учун биз ишлашга мажбур эмасмиз, бизнинг вазифа битта, футбол бўйича Ўзбекистон терма жамоаси иштирокидаги машғулотлардан репортажлар, видео ва фотоларни Сизларга тақдим этиш. Ундан кейин менинг иссиқ жойим ҳеч кимга керак эмас, менинг иссиқ жойим аслида жуда совуқ, турган-битгани ўз ёнингиздан харажат.

Эрта тонгда Мираброр Усмонов спортчи ва футболчиларимиз билан учрашиш мақсадида, спорт шаҳарчасига ташриф буюрдилар. Соат 9:00да бўлиб ўтган тадбирда Мираброр Зуфарович дастлаб барча спорт турлари бўйича мураббийларни қабул қилдилар. Ўз навбатида мураббийлар, Усмоновни Осиё доирасида катта унвонни қўлга киритгани билан табриклашди. Спортчилардан кейин Мираброр Зуфарович футбол делегациямиз вакиллари билан алоҳида суҳбат қурди. Терма жамоалар Марказининг техник директори Рустам Акрамов айни пайтдаги ҳолат ҳақида қисқача ахборот берди ва 20 йиллик ғалабани такрорлаш учун йигитларда барча шароит борлигини айтиб ўтди. Тадбир сўнггида барча қўлга киритиладиган олтин медаллар учун Ўзбекистон ҳукумати 6 000 АҚШ доллари қийматида мукофот пули ажратганлиги маълум бўлди.

Сайтда ҳамманинг кўнглини бирдек овлаш қийин. 40 000 нафар ўқувчидан ҳеч йўғи биттасига ишингиз ёқмаслиги аниқ. Кундалик эса жуда кўпчиликка манзур келаётгани учун ёзиляпти. Бунга Москвага саёҳат қилганимда амин бўлгандим.

21 сентябрь. Жанубий Корея, Инчеон

Нодирхўжа Юлдашев

Инчеондан ёзамиз. 8-кун кундалиги. ...Кундалик ўзи нима?