УEФА ташкилоти Англия футбол ассоциациясини Евро-2020 ярим финалидаги тартибсизликлар учун 30 минг евро жаримага тортди. Бу ҳақида УEФА расман маьлум қилди.

7 июль куни ўтказилган Англия - Дания (2:1) учрашувида Харри Кейн пеналтини амалга оширганди. Айнан ўша вазиятда дарвозабон Каспер Шмейхелнинг кўзига томошабинлар лазер нурини туширишганди.

Шу билан биргаликда, англиялик мухлислар майдонда пиротехника воситаларидан ҳам фойдаланишган, давлат мадҳиялари пайтида тартибсизлик келтириб чиқаришган.

УEФА айнан шу қоидабузарликлар сабаб 30 минг евро жарима жазоси тайинлади.

Эслатиб ўтамиз, 11 июль, соат 23:59 да Англия ва Италия термалари ўртасида Евро-2020 финал ўйини бўлиб ўтади.

Инглизлар Шмейхелнинг кўзига туширилган лазер учун жазоланишди