Ушбу турда биз "Милан дербиси"га гувоҳ бўлиш билан бирга, яхши спорт формасида бўлган "Эмполи" Римда "Рома" билан куч синашишини, Элдор "Специя" билан етакчи "Наполи"га қарши тўп тепишини кўришимиз мумкин. Муаммолар гирдобидаги "Ювентус" эса "Салернитана" меҳмони бўлади.

Назаримизда, турнинг марказий (ва ўзбекистонлик мухлисларга қизиқ бўладиган) учрашувлари превьюсини эътиборингизга тақдим этамиз.

"Рома" - "Эмполи"

"Кремонезе"га қарши кубокдаги тўқнашувдаги омадсизликдан кейин "Рома" таркибида ўзгаришлар бўлиши аниқ. Жароҳат сабаб Спиннацола баҳсда иштирок эта олмайди, лекин Челик сафга қайтди. Ҳужумчи Абрахамнинг иштироки ҳам сўроқ остида қолмоқда, аммо ўйингача у тўлиқ тайёр бўлиш эҳтимоли мавжуд.

Меҳмонлар таркиби ҳақида гапирарканмиз, Паризи ва Хендерсон сафга қайтишини таъкидлаш зарур. Бироқ Грасси, Дестро, Исмайли ва Тонелли сингари футболчилар жамоага ёрдам бера оладими ёки йўқ, деган савол очиқ қолмоқда. Кристиан Занетти ҳужумда катта эҳтимол билан Сатриано-Капуто дуэтига ишонч билдиради.

Биринчи давра баҳсида "Рома" қийинчилик билан 2-1 ҳисобида зафар қучган. Ҳозир ҳам айнан "жалоросси" фаворит, бироқ "Эмполи"нинг имконияти мутахассислар қайд этаётганичалик паст эмасдек, назаримда. "Рома" яхши спорт формасида ва стабил ўйин кўрсатяпти деб бўлмайди, лекин "Эмполи" эса анчадан буён мағлуб бўлмайди ва чиндан яхши формага кириб олган. Жозе Моуриньо жамоасига осон бўлмаслиги турган гап.

"Специя" - "Наполи"

"Специя"да таркиб борасида муаммолар мавжуд. Нзола, Коваленко, Бастони ва Зут ҳамон тикланиш жараёнини бошдан ўтказмоқда, Гьясси эса дисквалифиция қилинган. Бундай ҳолатда Шомуродовнинг трансфери айни муддао бўлди ва ҳамюртимиз учрашувни асосий таркибда бошласа ажаб эмас. Унга ҳужумда Верде ва Река ёрдамлашади.

"Наполи"да эса ҳаммаси шунчаки ажойиб. Футболчиларнинг барчаси соғ ва фойда келтиришга тайёр. Катта сюрпризларни кутишга ўрин йў. Кўп эҳтимол Спаллетти ортиқча экспериментга қўл урмайди. Балки ҳужумда Осимхен ўрнига Жованни Симеоне ўйинга тушар, кичик Симеоне "Рома"га қарши баҳсда айниқса фаол эди. Лозано ва Хвича қанотлардан форвардга ёрдамлашади.

Жамоаларнинг биринчи даврадаги баҳси анча муросасиз руҳда ўтган, "Наполи" жиддий қаршиликка дуч келганди. Ўйин тақдирини эса Распадори охирги дақиқаларда киритган ягона гол ҳал этган. Титул томон ишончли одимлаётган "Наполи" бу учрашувда ҳам яққол фаворит, лекин ўйин қандай бўлишини юз фоиз ишонч билан айтиб бўлмайди. "Специя" Неаполнинг ҳужум чизиғини тўхтатиб қола оладими, Шомуродов етакчига қарши баҳсда ўзини кўрсата олармикин? Саволларга жавоб олиш учун ўйинни албатта кузатиб бориш зарур.

"Интер" - "Милан"

Шкриньяр ва Барелла дисквалификация муддатини ўтказишди ва ўйинга тайёрлар, лекин словакиялик ҳимоячи асосий таркибда тушиши аниқ эмас. Барелла эса майдон марказида Мхитарян ва Чалханоглу билан ёнма-ён ҳаракат қилиши жуда зарур. Брозович катта эҳтимол захирадан баҳсга қўшилади. Ҳужумда эса Инзаги дербида Ромелу Лукакуга имкон бериши мумкин.

Пиолининг бошини оғритадиган масалалар эса анча-мунча. Шундоқ ҳам етарли бўлган жароҳатларга Бенасерники қўшилди, ярим ҳимоячи ўйинни ўтказиб юбориши аниқ ва унинг ўрнини Побега эгаллаши кутилмоқда. Меньян ва Томори сафга қайтиб улгургани айтилмоқда, лекин улар бирданига бундай тўқнашувда майдонга туширилармикин?

Яқинда жамоалар мамлакат Суперкубогида рўбаро келишганди, ўшанда "Интер" ишончли ўйин кўрсатиб, 3-0 ҳисобида ғалаба қозонганди. Бўлажак баҳс олдидан ҳам "нерадзурри" фаворит. "Милан" ҳозир оғир даврни бошдан ўтказмоқда. Буни жамоа устози ҳам тан олиб улгурди. Бироқ "Интер"нинг ўзи ҳам стабиллик борасида мақтана олмайди. Нима бўлганда ҳам бу дерби ва унда исталган воқеа юз бериши мумкин.

"Салернитана" - "Ювентус"

Давиде Никола бу беллашувда Пентек-Диа дуэтини ишга солмоқчи, бу икки футболчи аввалги баҳсда жуфтлик сифатида ўзини ижобий томондан кўрсата олди. Мажори ва Фацио ҳали ҳам лазаретда, шу сабаб ҳимоя марказида Бронн ва Трост-Эконгни кўрамиз.

Погба ва Бонуччининг сафга қайтилиши кутилганидан чўзилмоқда, Влахович эса кубок доирасида "Лцио"га қарши ўйинда иштирок этиб улгурди. Милик жароҳат олиб, бир ойга сафдан чиққан бир вазиятда Душан асосий таркибда бўлиши деярли аниқ. Ҳужумда сербияликка Ди Мария ва Кьеза ёрдамлашади.

Аввалги драматик баҳс 2-2 ҳисобида якунланганди. Ҳозир эса мутахассислар "Ювентус"нинг имкониятларини анча юқори баҳолашмоқда. Қоғозда "кекса синьора" чиндан фаворит, "Монца"га қарши омадсизликдан кейин яна очко йўқотиб бўлмайди. Шу каби барча факторларни инобатга олиб, Аллегри жамоаси мусобақа жадвалидаги қўшниларини мағлуб этиши керак.

Сергей Румянцев

Нозима Тўхтамирзаева таржимаси

"Интер" - "Милан" ёхуд Шомуродов "Наполи"га қарши дебют қилади