"Сампдория" - "Ювентус"

Торсбюнинг сафга қайтиши ажойиб янгилик бўлган бўлса-да, сариқ карточкалар сони туфайли ўйинни ўтказиб юборадиган Муррунинг йўқлиги Жампаолони хафа қилгани аниқ. Майдонга Берешиньский тушади, ҳужумда эса доимгидек Капуто-Квальярелла дуэтини кўрамиз. "Ювентус"да эса йўқотишлар жуда кўп. Дибала, Закария, Кьеллини, Боннуччи, шунингдек, сариқ карточкалар сони кўплиги туфайли Бернардески ўйинни ўтказиб юборишади. Влахович ҳам майдонга тушиши сўроқ остида турибди. Лекин Куадрадо тикланиб, жамоасига ёрдам бериши мумкин.

Жамоалар охирги марта шу йилнинг январида Италия Кубоги доирасида учрашишган эди. Ўшанда "кекса синьора" 4:1 ҳисобида ғалаба қозонган. Ҳозир ҳам туринликлар фаворит ҳисобланмоқда. Охирги пайт генуяликларнинг ўйини яхши эмас, шу сабабли етакчилардан бирини тўхтатиш осон бўлмайди.

"Милан" - "Эмполи"

Эрнандес дисквалификация қилинган, унинг ўрнига Флоренци майдонга тушади. Аммо қувонарлиси, Жиру, Златан ва Романьоли сафга қайтди. Фақатгина кичик жароҳати туфайли Бакайоко баҳсни ўтказиб юбориши мумкин. Зурковски сафга қайтиши "Эмполи" мураббийлик штабини қувонтиргани аниқ. Аммо афсуски, Маркицца эса ҳали ҳам лазаретда. Бироқ жамоа "Интер"нинг собиқ форварди, мунтазам равишда "Милан"га гол урган Пинамонти ҳужумда ажойиб ўйин кўрсатишидан умид қилмоқда.

1-даврада бу икки жамоа ўртасида шиддатли баҳс бўлган ва учрашув Тосканада 4:2 ҳисобида миланликлар ғалабаси билан якунланганди. Ҳозир ҳам "россонери" фаворит. Ҳа, А Серия пешқадамига қарши учрашувда "Эмполи"га осон бўлмаслиги аниқ.

"Верона" - "Наполи"

Маълумотларга қараганда, Барак майдонга тушиши ва "мастифлар" ҳужумини кучайтириши мумкин. Лекин Давидович ва Пандур учрашувни ўтказиб юборишади. Шу сабабли, мураббий ҳимоя чизиғига кимни қўйиш борасида обдон ўйлаб кўриши керак. "Наполи"га келадиган бўлсак, жароҳати туфайли Алекс Мерет ўйнамайди. Туанбезе ва Малькью эса ҳамон жароҳатини даволаш билан оввора. Катта эҳтимол билан Инсинье захирада қолади.

Охирги марта жамоалар Неаполда ўйнаб, дуранг (1:1) қайд этишганди. "Партенопейлар" ҳозир ҳам устунроқ.

"Удинезе" - "Рома"

Уоллес сариқ карточкалар сони туфайли баҳсни ўтказиб юборади, Макенго майдонга тушиши эса сўроқ остида турибди. Ҳозир ажойиб формада бўлган Удине жамоасида бошқа муаммолар йўқ. "Рома"даги асосий янгилик — дисквалификация сабабли 2та учрашувни ўтказиб юборган Жозе Моуриньо яна жамоа билан бирга. Аммо Мхитарян ва Кумбулла клубига ёрдам беролмайди. Катта эҳтимол билан ёш Залевски майдон марказида ўйнаши мумкин.

Сўнгги ўзаро баҳсда "Рома" 1:0 ҳисобида ғолиб бўлган. Умуман олганда, бу икки клуб ўртасида ажойиб анъана бор: бир-бирига жавоб голини урмаслик. Охирги 8 ўйинда шундай бўлган. Бу гал "Рома" фаворит, аммо "Удинезе" етакчиларга қарши баҳсларда кўпчиликни лол қолдириши мумкинлигини унутмаслик лозим.

"Торино" - "Интер"

Иван Юричнинг таркиб билан боғлиқ қатор муаммолари бор. Жароҳат туфайли Милинкович-Савич, Прат ва Фарес ўйнамайди, Белотти ва Эдера майдонга тушиши аниқ эмас. Индзаги эса бир неча ҳафтага сафдан чиққан Де Врейсиз баҳсни ўтказишга мажбур. "Интер"да бошқа йўқотишлар йўқ. Aммо жамоа Энфилдда ғалаба қозонган бўлса-да, анча куч сарфлади. Шу сабабли ўша учрашувдан кейин таркиб қанчалик ўзгаришини кузатиш қизиқ бўлади. Англияда майдонга тушмаган Барелланинг иштироки жуда муҳим.

Биринчи давра учрашувларида "Интер"Дюмрфиснинг голи эвазига ғолиб бўлганди. Ҳозир ҳам "нерадзурри" рақибига қараганда анча яхши формада.

Сергей Румянцев
Нозима Зарипова таржимаси

"Интер" Туринга боради, етакчи "Эмполи"ни қабул қилади: А Серия 29-тур превьюси