У Италия терма жамоаси энг яхши тўпурари, Сардиниянинг ҳақиқий афсона бўлган. Ахир бекорга 11-рақамни унга беришмаган. Ҳа айтганча, у маълум вақт Бареллани шуғуллантирган ҳамда футболчининг улкан салоҳиятга эга эканлигини таъкидлади. Қизиқ томони шундаки, У "Интер"нинг ашаддий мухлиси, Николони ўзи эса бир вақтнинг ўзида ҳар икки клубга ишқибозлик қилади ва табассум билан кўк-қора футболкада тушган суратини кўрсатади. Ўша вақтлардаёқ Деян Станкович унинг кумирига айланиб улгурган. Ўйин услуби, майдондаги ҳаракатлари билан Барелла чиндан сербиялик ҳамкасбига ўхшаб кетади.

2015 йил Барелла 18 ёшида А Сериядаги дебютини ўтказган. Мавсум охирида 3 учрашувда иштирок этди, "Кальяри" эса Б Серияга тушиб кетди. У ерда ёш футболчи 5та ўйин ўтказди, лекин уша кезлардаёқ футболчига янги чақирув зарурлиги сезилиб турарди. Футболчи "Комо"га кўчиб ўтади. Жамоани ўшанда Жанлука Феста бошқарар, улар Николо билан "Кальяри" ёшлар жамоасида бирга ишлаганди. Барелла тезда янги жамоага кўникиб кетди ва ўзига бўлган ишончи ортди. 16 беллашувдаги ҳаракатлари билан у яна А Серияга қайтган "Кальяри" сафига қайтишга лойиқлигини кўрсатган эди.

2016/17 йиллардаги мавсум Николо учун жуда омадли бўлди. У 28 учрашувда майдонга тушди ва ўзининг ижобий жиҳатларини намоён қила билди. Голли узатмалардан ташқари, Николо дарвозага ҳам тортинмай зарба берарди, аммо уларга аниқлик етишмасди. Ҳаммасидан ҳам Барелланинг майдондаги нуқтасини топиш мушкул вазифа эди. У бир вақтнинг ўзида деярли исталган нуқтада ўйнай олар, бироқ ҳеч қаерда муқим ўрнаша олмасди. Шу сабабли бўлса керак, баъзан унинг ҳаракатларида шошқалоқлик сезиларди. Яхши жиҳати шундаки, ёш иқтидор соҳиби ўз устида ишлашдан, билмаганларини ўрганишдан қочмасди.

Ўтган мавсум футболчи статистик кўрсаткичларини ҳам анча яхшилаб олди ва "Кальяри"нинг ҳужумларидаги асосий фигуралардан бирига айланди. Николонинг ҳисобида ўтган мавсум якунлари бўйича 6 гол ва 2та голли узатма мавжуд. Барелла ярим ҳимоянинг исталган чизиғида ўйнай олади. Баъзан у классик таянч ярим ҳимоячиси ролида гавдаланса, кўп ўтмай уни ҳужумчилар ортида фаоллик кўрсатаётганини кўришимиз мумкин. Тўп билан муомала қилиш, қисқа ва узун масофаларга тўп оширишлар борасида Николо яхши кўрсаткичларга эга. Қаҳрамонимиз тўпни тезкорлик билан ошириш борасида эса чемпионатнинг энг яхши ярим ҳимоячиси саналади. Бу борада у энг яқин тақибчи - жамоадоши Наингголанни 25 уринишга ортда қолдирган. Бундан ташқари, Барелла яккакурашда катта кўламдаги ишни бажаради. Охирги икки мавсумни оладиган бўлсак, айнан у А Серия вакиллари ичида энг яхши натижа қайд этган.

Ўтган мавсум "Кальяри"нинг ўйини тўлалигича Барелла орқали ташкил қилинарди ва баъзан бу жамоага қимматга тушарди. Барелла доим ҳам "тоза" ўйнамайди ва вақти келганда қўполлик ишлатишга мажбур бўлади. Лекин "Интер"да бу борада унга анча осон бўлса ажабмас. Жамоада сифатли футболчилар жамланган. Демак, Барелла ярим ҳимоянинг барча чизиқлари бўйлаб "кўчиб", бўш зонани "ёпиб" юришига тўғри келмайди.

Майдонда унинг ёнида ўзи каби кучли ва курашдан қайтмайдиган Брозовичнинг борлиги жуда муҳим. Учликнинг яна бир аъзоси катта эҳтимол билан Весино/Сенси бўлса керак. Албатта, агарда "Интер" бошқа бир ҳужумкор ярим ҳимоячини сотиб олмаса... Барелла учун бу трансферни Антонио Контенинг ўзи илтимос қилгани ва севимли клубида ўйнаш имконияти пайдо бўлгани жуда аҳамиятли. Ахир қишда Николони сотиб олишни Сарри, ёзда эса "Рома" ва "Милан" хоҳлаганди, лекин Николо қатъий турди - фақат "нерадзурри"!

"Интер" ёш футболчи учун каттагина суммадан воз кечишига тўғри келди. Фақатгина Вьери "қора-кўклар"га қимматроққа тушганди. Албатта бундай трансфер доимо эътибор марказида бўлади ва каттагина таваккалчикка қўл урилади. Бироқ Антонио Конте нима қилаётганини тушуниб турибди. Қачонлардир айнан Конте Мароттани "Байер"дан Артуро Видални харид қилишга кўндирганди ва чилиликни дунёнинг энг яхши ярим ҳимоячиларидан бирига айлантирганди. Видаль тўпсиз жуда яхши ҳаракат қиларди, лекин ҳеч қачон Барелла каби дид билан кутилмаган тўп оширишларни унинг ижросида кўрмайсиз. Николо чиндан яқин келажакда Артуронинг ўрнини тортиб олиши мумкин. Ҳозирнинг ўзида Барелла Италия термаси механизмининг муҳим деталларидан биридир.

Барелла унинг ёшидагиларга ўхшамайдиган ҳотиржамлик ва фикр-мулоҳазали йигит. Бунда унинг турмуш ўртоғи Федериканинг ҳам роли катта. У Николодан 7 ёшга катта ва Николо бугунги даражасига чиқиши учун Федерика кўп ҳаракат қилди. Барелла майдон ташқарисида содда ва жим юрадиган, ортиқча шовқинни ёқтирмайдиган инсонлардан ҳисобланади. Характери бошқачароқ бўлганда ҳам, тунги клублар, дискотекаларга Николонинг вақти етмасди. Бугунги кунда у турмуш ўртоғи билан икки қизни тарбиялашмоқда ва уларнинг кичиги ҳали бир ёшга ҳам тўлмаган.

Футболдан ташқари, Бареллага баскетбол жуда ёқади ва қачон бўлса-да, Лебронни кўришни орзу қилади. У ҳатто ўз кучугини ҳам буюк баскетболчи шарафига номлаган. НБА Барелла инглиз тилини ўрганишида катта ёрдам берган, аммо кунлик режими бузилишига ҳам сабаб бўлган эди. Футболчи "Комо" шарафини ҳимоя қилган вақтларда ўз агентидан хонасига телевизор ва севимли лигаси ўйинларини кўриш имкониятини яратиб беришни сўраган. Барелла "революциясини" кузатиш, футбол юлдузи, "Интер" етакчисига айланаётганини кузатиш чиндан қизиқарли. Конте эса бунда унга ёрдам бериши зарур.

Муаллиф: Сергей Румянцев
Таржима: Нозима Зарипова

"Интер"нинг энг қиммат трансфери ҳақида