Шиддатли кечган ўйинда майдон эгалари 3:2 ҳисобидаги ғалабани тантана қилди. Ушбу баҳсдан сўнг "Бунёдкор" ҳимоячиси Ислом Қобиловнинг фикрларига қулоқ тутдик.

"Аввало ғалаба билан жамоамизни ва мухлисларни табриклайман. Ўйинга келадиган бўлсак, бундай дербиларга ортиқча тайёргарликнинг ҳожати йўқ. Бундай паллада футболчилар шундоқ ҳам ўзларининг энг яхши ўйинларини кўрсатишмоқчи бўлишади. Мазкур учрашувдан олдин "Бухоро"га қарши майдонга чиққан эдик, шу боис "Пахтакор" билан кечадиган ўйинга тайёргарлик учун вақт ҳам йўқ эди. Биринчи даврадаги мағлубият учун ҳам боримизни бериб ҳаракат қилдик",- дейди Ислом Қобилов.

- Ўтган мавсумда ҳам "Бунёдкор" ўз майдонида худди шундай натижа қайд этган эди. Нима деб ўйлайсиз, футболчиларнинг кучли рақибларга қарши бошқача иштиёқ билан майдонга чиқиши руҳият билан боғлиқми?

- Албатта, руҳият билан боғлиқ десам ҳам бўлади. Биз шунчаки мураббийимизнинг кўрсатмаларини катта иштиёқ билан бажардик ва "Бунёдкор"нинг шаъни учун ўйнадик.

- Жамоа ҳисоб тенглашган вақтда ҳам босиқлик ва совуққонлик билан ҳаракат қилди. Айнан шу омил аввалги учрашувларда етишмаётганди...

- Тўғри, ўтган турларда бизга бу нарса ҳам етишмаётган эди. Аввалги ўйинлардаги хатоларни такрорламасликка ҳаракат қилдик.

Абдулазиз Искандаров ёзиб олди.

Ислом Қобилов: "Бунёдкор"нинг шаъни учун ўйнадик"