"Мухлисларга ёқадиган голларга бой ўйин бўлди. Учрашув бошида тезкор гол ўтказиб юбордик. Баҳсни 0:1 ҳисобидаги мағлубият бошладик десак ҳам бўлади. "Металлург" жамоаси ҳам яхши ўйнади. Ҳимояда яхши ўйнаб қарши ҳужумлардан унумли фойдаланишди.

"Металлург" доим ўз уйида жуда яхши ўйнайди. Ҳар йили бу жамоа билан баҳсларда қийналамиз. 10 киши бўлиб қолганимиздан кейин ҳам ғалаба учун ҳаракат қилдик. Аммо рақибда қарши ҳужумлар учун бўш жойлар кўп бўлди.

Учрашувдан келиб чиқсак дурангдан қониқдик десам бўлади. Аммо баҳсдан олдин кимдир дуранг бўлади деса бунга рози бўлмасдим, бизга ғалаба керак эди.

Урган голимга келсак "Металлург"нинг учинчи голида менинг айбим бўлди. Шу боис жарима тўпини ўзим тепишга ва айбимни ювишга ҳаракат қилдим. Шукурки гол урдим.

Ҳимояда мен билан бирга ўйнаётган Сергей Прохоров ҳақида нима дея оламан? Ёш, иқтидорли футболчи. Тажриба йиллар давомида келади. Агар шундай ишлашда давом этса юртимиз учун керакли ҳимоячи бўлиб етишади.

Июль ойида "Локомотив" Минск шаҳрида йиғин ўтказади. Лекин мен Беларусга бормайман. Сабаби ўша пайтда терма жамоа сафида Австрия йиғинида бўламан, - дейди Ислом Тўхтахўжаев.

"Локомотив" матбуот хизмати

Ислом Тўхтахўжаев: "Баҳсни 0:1 ҳисобидаги мағлубият билан бошладик десак ҳам бўлади"