Тенгма-тенг курашлар остида ўтган учрашувда меҳмонлар ортга 1:2 ҳисобидаги мағлубият билан қайтишга мажбур бўлишди. Ушбу беллашувдан сўнг "Сурхон" жамоасининг ягона голига муаллифлик қилган Жаҳонгир Меҳмонов фикрлари билан ўртоқлашди.

"Локомотив" билан ўйин осон ўтмаслигини билардик. Лекин, уларга қарши аввалги учрашувларга қараганда мазмунлироқ ҳаракат қилдик деб ўйлайман. Мағлубиятга учраган бўлсакда ўйин жиҳатдан ҳаракатларимиз бироз қовушди. Жамоамизда тажрибали ва яхши футболчилар йиғилган. Икки кун ичида Равшан Ҳайдаровдан нимадир олдик. Муҳими керакли сўзни топиб айта олдилар. Олдинги турларда нимадир етишмаётганди. Ўша етишмаётган нарсани мураббийимиз Равшан Ҳайдаров топди.

Ўйлашимча, "Локомотив" жамоасида тажрибали футболчилар олдингига қараганда камайган. Уларнинг ўрнини ёш иқтидорли футболчилар эгаллаган. Ёшларга ҳам қачондир имконият бериш керак. Шунингдек, жамоани малакали мураббий Андрей Фёдоров бошқармоқда. Мағлубиятга учрадик. Ҳаёт давом этади. Насиб қилса кейинги ўйинларда ғалаба қозонишга ҳаракат қиламиз",- дейди Жаҳонгир Меҳмонов.

Жаҳонгир Меҳмонов: "Аввалги ўйинларга қараганда мазмунлироқ ҳаракат қилдик"