Ўтган йилдан бери "Локо" асосий таркибида ўйнаб келаётган Жумабоев ўз интервьюсида Туркия йиғини, янги мураббий ва жамоадаги рақобат ҳақида тўхталди.

Хориж йиғини ҳақида

- Туркияга келганимиздан бери ҳар бир машғулот яхши ва қизиқарли ўтяпти. Машғулот пайтида кўпроқ ўйин ва тактика билан боғлиқ машқларни бажаряпмиз. Йиғин жамоадаги ҳаммага ёқяпти деб ўйлайман. Ўз навбатида жисмоний тайёргарликка ҳам катта эътибор қаратяпмиз.

Янги мураббий ҳақида

- Португалиялик мураббий Микаэль Секейра қўл остида кўп нарсаларни ўрганяпмиз. Машғулотларда унча қийналаётганимиз йўқ. Мураббий нима деса шуни бажаришга ҳаракат қиляпмиз. Машғулотда бажарилаётган машқлар жуда фойдали эканини кўряпмиз.

"Десна" билан кечган ўртоқлик учрашуви ҳақида

- Бу бизнинг Туркиядаги биринчи ўйинимиз бўлди. Учрашув ўзига яраша оғир, шу билан бирга қизиқ кечди. Кўплаб ҳужумлар уюштирдик, аммо тўп кирита олмадик. Бизда янги жамоа шаклланяпти, шу боис мураббийнинг тактикасига мослашиб кетиш учун бироз вақт керак бўлади.

Жамоадаги рақобат ҳақида

- "Локомотив"да ҳар доим рақобат кучли бўлган. Ҳозир ҳимоя чизиғимизда ҳам рақобат кучли. Мана, "Бунёдкор"дан Ислом Қобилов келди, испаниялик легионер Диего Барданка жамоамизга қўшилди. Мен ҳам бор кучим билан ишлаб асосий таркибдан ўрин эгаллашга ҳаракат қиламан.

Жалолиддин Жумабоев: "Локомотив"да ҳар доим рақобат кучли бўлган"