Мазкур баҳс олдидан гонконгликлар бош мураббийи Роберто Лосада фикрларига қулоқ тутдик.

- Роберто, сиз “Сўғдиёна”га қарши учрашувдан нималар кутмоқдасиз?
- Авваламбор, эътибор учун миннатдорчилик билдираман. Бу ўйин биз учун яхши тажриба бўлади. Негаки, таркибимизда кўплаб ёш футболчилар бор. Кейинги мавсумларга яхши тажриба олиш имкониятига эга бўламиз. “Сўғдиёна” яхши жамоа, уларга қарши ўйнаш орқали ёшларимиз ўзларига ишонч ошира олади.

- Сизнингча, “Сўғдиёна” сафида энг кучли футболчи ким?
- Мен кузатдим, рақибимиз жуда яхши жамоа. Таркибидаги барча футболчилари юқори савияда экани кўзга ташланди. Назаримда, жамоа сардори (Жасур Ҳасанов – муаллиф) чап қанот ярим ҳимоясида жуда хавфли экан. У ўз қанотида жуда яхши футболчи ва рақибга хавф туғдира олишини кўришга муваффақ бўлдим.

- Сизлар учун ўйиннинг Ўзбекистонда ўтиши қанчалик ёмон?
- Дарҳақиқат, биз ўз майдонимизда ўйнашни афзал кўрардик, лекин пандемия туфайли Ўзбекистонга тўп тепишга мажбурмиз. “Сўғдиёна” ўз майдонида ўйнаши улар учун жуда фойдали. Чунки мухлислар қўллаб-қувватлайди. Лекин сафарда ўйнашимизга қарамай, ижобий натижа кўрсатишга ҳаракат қиламиз.

- “Истерн”нинг ОФК кубогидаги асосий мақсади нималардан иборат?
- Мусобақа орқали яхши тажриба олмоқдамиз. Ўзбекистонда ҳам яхши ўйин кўрсатишга ҳаракат қиламиз. Зеро, стадионга келган томошабин икки жамоа ўйинидан баҳраманд бўлишини истаймиз. Ҳозирда бизда ҳеч қандай босим йўқ. Тўғри, рақиб биздан кучли ва фаворит экани ҳеч кимга сир эмас. Биз босимсиз мақсадга эришишга интиламиз.

Эслатиб ўтамиз, "Сўғдиёна" - "Истерн" учрашуви 6 сентябрь куни соат 18:00да Жиззахдаги "Сўғдиёна" стадионида бошланади.

Самандарбек суҳбатлашди

✏️ “Жамоа сардори энг хавфли футболчи!”. “Истерн” бош мураббийи “Сўғдиёна” ҳақида нималар деди?